நொடியில் நடந்த விபத்து…! கன்டெய்னர் கவிழ்ந்து முழு சாலையும் முடக்கம் ...! - மக்கள் அவதி!

பஞ்சாபிலிருந்து திண்டுக்கலுக்காக சைக்கிள்கள் ஏற்றிகொண்டு புறப்பட்டிருந்த கன்டெய்னர் லாரி, தர்மபுரி மாவட்டம் தொப்பூர் கணவாய் அருகே நேற்று காலை எதிர்பாராத விபத்தில் சிக்கியது. உத்தரப்பிரதேசத்தை சேர்ந்த 35 வயது பாரூக் ஓட்டிச் சென்ற லாரியில், சுமார் 45 வயது மதிக்கத்தக்க கிளீனர் உள்பட இருவரும் பயணித்துக் கொண்டிருந்தனர்.

கட்டமேடு முதல் வளைவை நெருங்கியபோது திடீரென ஓட்டுநரின் கட்டுப்பாட்டை இழந்த லாரி, சாலையோரம் வேகமாக சாய்ந்தபடி சென்று மிகப்பெரிய சத்தத்துடன் கவிழ்ந்தது. அதிர்ஷ்டவசமாக, லாரியில் இருந்த டிரைவர்-கிளீனர் இருவரும் எந்தக் காயமும் இன்றி உயிர் தப்பினர்.

ஆனால் இந்த விபத்தின் தாக்கம் தர்மபுரி–சேலம் தேசிய நெடுஞ்சாலையில் பெரும் போக்குவரத்து நெரிசலை ஏற்படுத்தியது. இரண்டு மணி நேரத்துக்கும் மேலாக நூற்றுக்கணக்கான வாகனங்கள் நீண்ட வரிசையில் சிக்கிக் கொண்டன. பின்னர் போலீசார் மற்றும் மீட்புக்குழுவினர் இணைந்து லாரியை கிரேன் மூலம் அப்புறப்படுத்தியதையடுத்து, போக்குவரத்து வழமைக்கு திரும்பியது.

இந்த சம்பவத்துக்கு தொடர்பான வழக்கை தொப்பூர் போலீசார் பதிவு செய்து, காரணங்களைத் தெளிவுபடுத்தும் வகையில் விசாரணை தொடங்கி உள்ளனர்.