90களின் ஹிட்டான நடிகர் கார்த்திக்கைப் பற்றி இயக்குநர் பாரதி கண்ணன் சமீபத்தில் பேசிய கருத்துகள் சமூக வலைதளங்களில் பெரும் விவாதத்தை உருவாக்கின. கார்த்திக் போல மிமிக்ரி செய்து, “அட்வான்ஸ் பணம் வாங்கி திருப்பித் தரவில்லை” என்று கூறிய அவர், பின்னர் லேசாக மிரட்டல்களும் வந்ததாகவும், தாம் பேசியதற்கு வருத்தம் உள்ளதாகவும் தெரிவித்தார்.

இந்த சர்ச்சை அதிகமாகும் நிலையில், கார்த்திக்கின் மகன் கௌதம் முதன்முறையாக மன வருத்தத்துடன் தனது பதிலை வெளியிட்டுள்ளார்.

கௌதம் கூறியதாவது:“என் தந்தையைப் பற்றிய விமர்சனங்கள் வரும்போது மிகவும் வேதனையாக இருக்கிறது. அதை கேட்பதே எனக்கு காயமாக உள்ளது. விமர்சனம் செய்யும் அனைவரும் நாங்கள் பார்த்து வளர்ந்த பெரியவர்கள். அந்த காலத்தில் அவர்கள் எல்லோரும் அண்ணன்–தம்பி மாதிரி, ஒரு குடும்பம் போல இருந்தவர்கள். பிரச்சனை இருந்தால் நேருக்கு நேராக பேசிக் கொண்டிருக்கலாம். அதை விட்டுவிட்டு இப்போது பொதுத்தளத்தில் பேசுவதால் எதுவும் நல்லது நடக்காது.”

மேலும் அவர்,“பொது மேடையில் பேசுவதற்கு ஏராளமான நல்ல விஷயங்கள் இருக்கின்றன. இப்படிப் பட்ட தனிப்பட்ட சர்ச்சைகளை வெளியே சொல்ல வேண்டாம்,”என்றும் கேட்டுக் கொண்டார்.

கார்த்திக் குறித்து பல வருடங்களாகவே படப்பிடிப்பு நேரம், கால்ஷீட் பிரச்சனைகள் போன்ற வதந்திகள் நிலவி வந்தாலும், அவரை நேசித்த ரசிகர்களும், தொழிலில் இணைந்து பணியாற்றிய சில இயக்குநர்களும் எப்போதும் அவரை திறமையான நடிகராகவே பாராட்டி வந்துள்ளனர்.

எனினும், பாரதி கண்ணனின் சமீபத்திய கருத்துகள் புதிய சர்ச்சையை கிளப்பியுள்ளன. அதைத் தொடர்ந்து கௌதம் வெளிப்படுத்திய உணர்ச்சிப் பதில் சமூக வலைதளங்களில் பெரும் ஆதரவைப் பெறுகிறது.