பிரபல நடிகையைச் சார்ந்த தொடர்ச்சியான பாலியல் துன்புறுத்தல் வழக்கில், மலையாளத் திரைப்பட நட்சத்திரம் திலீப்பை விடுதலை செய்து, ஆறு பேரை குற்றவாளிகளாக அறிவித்திருக்கும் கேரள நீதிமன்றத் தீர்ப்பு பரபரப்பை ஏற்படுத்தியுள்ளது.

தீர்ப்புக்குச் சற்று முன் எர்ணாகுளம் நீதிமன்ற வளாகத்துக்கு வந்த திலீப், வெளிர் வெள்ளை சட்டை, நீல ஜீன்ஸ் பேன்ட் அணிந்தபடி அமைதியுடன் நடந்து வந்தார். லேசான தாடி, நெற்றியில் சந்தனம்– குங்குமம் என ஆன்மிகம் கலந்த தோற்றத்துடன் அவர் கூண்டுக்குள் அமைதியாக ஒரு ஓரமாக நின்றார்.

இந்த அமர்வு தொடங்கும் முன்பு பல்சர் சுனில் உள்ளிட்ட சிலர் சுலபமாக உரையாடிக் கொண்டிருக்க, திலீப் மட்டும் கண்களை மூடி இறைவனிடம் ஏதோ மனமுருக்கத்துடன் வேண்டிக்கொண்டார். தீர்ப்பை வாசிக்க நீதிபதி தொடங்கிய நொடி முதல் ஒவ்வொரு பெயரும் ஒலிக்கும் இடையே நீதிமன்றத்தில் மூச்சுத்திணறிய அமைதி நிலவியது.

தன்னுடைய பெயர் குற்றப்பட்டியலில் இல்லையென்பதை திலீப் தெரிந்துகொண்ட சில வினாடிகளில், நிம்மதி பாரமாக அவர் மார்பில் சரிந்தது.அதன்பின் “திலீப் விடுதலை” என நீதிபதி தெளிவாக அறிவித்த தருணத்தில், நீதிமன்றத்தின் குளிர்ச்சியைத் துளைத்துக் கொண்டாட்டக் குரல்கள் ஒலித்தன.

கொஞ்சம் முன் வரை இறுக்கத்தில் உறைந்திருந்த திலீப், முகத்தில் பெருவெற்றியின் புன்னகையை மலரச் செய்து, இரு கைகளையும் மேலே தூக்கி நன்றியுடன் பிரார்த்தனை செய்தார். சில நிமிடங்களிலேயே கோர்ட்டு வளாகம் விழாக்கோலம் கொண்டது; வழக்கறிஞர்கள், பத்திரிகையாளர், ரசிகர்கள் என பலரும் திலீப்பை சூழ்ந்து வாழ்த்தி, சிலர் அவருடன் உற்சாகமான செல்பிகளும் எடுத்தனர்.