நடிகர் அஜித் குமார் தனது கார் ரேசிங் பயணத்திலும், வரவிருக்கும் திரைப்படங்களிலும் தீவிரமாக ஈடுபட்டு வருகிறார். ‘குட் பேட் அக்லி’ வெற்றிக்குப் பிறகு, அஜித் நடிக்கும் AK64 படத்தை இயக்குநர் ஆதிக் ரவிச்சந்திரன் இயக்கவிருக்கிறார். அடுத்ததாக லோகேஷ் கனகராஜுடன் இணையும் திட்டமும் உறுதியாகி, அஜித் பக்கத்தில் ஒரே நேரத்தில் சினிமா, ரேசிங் என இரு துறைகளிலும் பிஸியாக இருக்கிறார்.

அஜித் தற்போது ஜனவரி மாதத்தில் நடைபெறவுள்ள Asian Le Mans Series கார் ரேஸுக்கு தீவிரமாக தயாராகி வருகிறார். இதில் இந்தியாவின் புகழ்பெற்ற கார் ரேஸர் நரேன் கார்த்திகேயனுடன் அவர் பங்கேற்கிறார்.

இதற்கிடையில், விமான நிலையத்தில் அஜித் காட்டிய எளிமை அனைவரையும் ஆச்சரியப்பட வைத்துள்ளது. சமூக வலைதளங்களில் வேகமாக பரவி வரும் வீடியோவில், ட்ராலியை தள்ளிக் கொண்டு வந்த அஜித், வீல்‌சேரில் அமர்ந்திருந்த முதியவரை கண்டு உடனே அவரின் காலில் விழுந்து ஆசீர்வாதம் பெறுவது பதிவாகியுள்ளது. பின்னர் அங்கு பணியில் இருந்த ஊழியர்களுடனும் கை கொடுத்து விட்டு வெளியேறுகிறார்.

சினிமா துறையில் மிகுந்த எளிமையும் மரியாதையும் கொண்ட நட்சத்திரமாக அஜித் அடிக்கடி பாராட்டப்படுவார். இந்த வீடியோவும் அதற்கு இன்னொரு சான்றாக மாறியுள்ளது. “சூப்பர் ஸ்டாராக இருந்தும் இத்தனை தாழ்மையா?” என ரசிகர்கள் பெருமையுடன் பகிர்ந்து வருகிறார்கள்.