திரையுலகின் உயரிய விருதான 98-வது ஆஸ்கர் விருதுகளுக்கான இறுதிப் பரிந்துரை பட்டியல் (Nominations) வெளியாகியுள்ளது. வரும் மார்ச் 16, 2026 அன்று லாஸ் ஏஞ்சல்ஸில் நடைபெறவுள்ள இந்த விழாவில், ஆஸ்கர் வரலாற்றிலேயே இதுவரை நிகழாத ஒரு புதிய சாதனை படைக்கப்பட்டுள்ளது.

சின்னர்ஸ் (Sinners) - மெகா சாதனை:

இயக்குநர் ரையன் கூக்லர் இயக்கத்தில் உருவான 'சின்னர்ஸ்' திரைப்படம், ஆஸ்கர் வரலாற்றிலேயே அதிகபட்சமாக 16 பிரிவுகளில் பரிந்துரைக்கப்பட்டு உலகைத் திரும்பிப் பார்க்க வைத்துள்ளது. இதற்கு முன் டைட்டானிக் (Titanic) மற்றும் லாலா லேண்ட் (La La Land) போன்ற பிரம்மாண்ட படங்கள் 14 பிரிவுகளில் பரிந்துரைக்கப்பட்டதே சாதனையாக இருந்தது. தற்போது அந்தச் சாதனையை ரையன் கூக்லர் முறியடித்துள்ளார்.

முக்கியப் போட்டிகள்:

லியனார்டோ டி காப்ரியோ நடித்த 'ஒன் பேட்டில் ஆஃப்டர் அனதர்' (One Battle After Another) 13 பிரிவுகளில் பரிந்துரை பெற்று இரண்டாம் இடத்தில் உள்ளது.

மார்ட்டி சுப்ரீம், சென்டிமென்டல் வேல்யூ மற்றும் ப்ராங்கன்ஸ்டைன் ஆகிய படங்கள் தலா 9 பரிந்துரைகளைப் பெற்றுள்ளன.

இந்தியாவிற்கு ஏமாற்றம்:

இந்த ஆண்டு ஆஸ்கர் ரேசில் இந்தியாவின் சார்பில் பெரிய எதிர்பார்ப்பை ஏற்படுத்தியிருந்த ஜான்வி கபூரின் ஹோம்பவுண்ட் (Homebound) திரைப்படம், இறுதிப் பட்டியலுக்குத் தேர்வாகாமல் வெளியேறியது இந்தியத் திரை ரசிகர்களிடையே ஏமாற்றத்தை ஏற்படுத்தியுள்ளது.