இந்தியாவில் எஸ்யூவி கார்கள் அதிகமாக பேசப்பட்டு வரும் சூழலிலும், செடான் கார் மார்க்கெட் தொடர்ந்து வளர்ச்சி அடைந்து வருகிறது. குறிப்பாக பிப்ரவரி 2026 மாதத்தில் மட்டும் 35,919 செடான் கார்கள் விற்பனையாகி, கடந்த ஆண்டை விட 22.4% வளர்ச்சி பதிவு செய்யப்பட்டுள்ளதாக தகவல்கள் தெரிவிக்கின்றன.

இந்த விற்பனையில் மாருதி சுசுகி டிசையர் வழக்கம்போல முதலிடத்தை பிடித்து மார்க்கெட்டை ஆதிக்கம் செலுத்தியுள்ளது. பிப்ரவரி மாதத்தில் மட்டும் 19,326 யூனிட்கள் விற்பனையாகி, மொத்த செடான் சந்தையின் சுமார் 54% பங்கைக் கைப்பற்றியுள்ளது. அதாவது, விற்பனையான இரண்டு செடான் கார்களில் ஒன்று டிசையர் என்ற நிலை ஏற்பட்டுள்ளது.

இரண்டாவது இடத்தில் ஹூண்டாய் ஆரா உள்ளது. இந்த மாடலின் விற்பனை 40% உயர்ந்து 6,733 யூனிட்களை எட்டியுள்ளது. மூன்றாவது இடத்தில் ஹோண்டா அமேஸ் 3,513 யூனிட்கள் விற்பனையுடன் நிலையான இடத்தை தக்கவைத்துள்ளது.

மிட்-ரேஞ்ச் செடான் பிரிவில் போட்டியும் சுவாரஸ்யமாக இருந்தது. ஃபோக்ஸ்வேகன் விர்டஸ் 1,804 யூனிட்கள் விற்பனையாகி சிறிய சரிவைக் கண்டது. அதே நேரத்தில் ஸ்கோடா ஸ்லாவியா 1,674 யூனிட்கள் விற்பனையுடன் 85.8% என்ற பெரிய வளர்ச்சியை பதிவு செய்து ஆச்சரியம் அளித்துள்ளது.

இதற்கிடையில் டாடா டிகோர் 1,447 யூனிட்களுடன் பின்னடைவு கண்டுள்ளது. மேலும் ஹூண்டாய் வெர்னா (694 யூனிட்கள்) மற்றும் ஹோண்டா சிட்டி (525 யூனிட்கள்) போன்ற மாடல்களின் விற்பனையும் குறைந்துள்ளது. இருப்பினும், இம்மாடல்களுக்கு புதிய அப்டேட்கள் வரவுள்ளதால் எதிர்காலத்தில் விற்பனை மீண்டும் அதிகரிக்கலாம் என்று எதிர்பார்க்கப்படுகிறது.

எஸ்யூவி கார்கள் தற்போது டிரெண்டாக இருந்தாலும், செடான் கார்கள் இன்னும் வலுவான மார்க்கெட்டை வைத்திருக்கின்றன என்பதை பிப்ரவரி 2026 விற்பனை கணக்குகள் தெளிவாக காட்டுகின்றன. டிசையர் போன்ற மாடல்கள் மார்க்கெட்டை முன்னின்று வழிநடத்தும் நிலையில், ஸ்லாவியா போன்ற மாடல்கள் வலுவான மீள்ச்சியை பதிவு செய்து வருகின்றன. வரும் மாதங்களில் புதிய மாடல்கள் இந்த செக்மென்ட்டை எப்படி மாற்றப்போகின்றன என்பது கவனிக்க வேண்டியதாக உள்ளது.