இந்திய கார் சந்தையில் செப்டம்பர் மாதம் ஒரு அதிரடி மாற்றத்தை கண்டுள்ளது. வழக்கமாக ஸ்விஃப்ட், வேகன்ஆர், பிரெஸ்ஸா போன்ற மாடல்கள் முதலிடத்தை பிடித்து வந்த நிலையில், இம்முறை மாருதி சுஸுகியின் டிசையர் கார் அனைத்து மாடல்களையும் பின்னுக்குத் தள்ளி விற்பனையில் சாம்பியனாக மாறியுள்ளது!

ஜிஎஸ்டி குறைப்புக்குப் பிறகு, இந்தியாவில் கார் விற்பனை பெருமளவில் உயர்ந்துள்ளது. புதிய கார் வாங்கும் வாடிக்கையாளர்கள் எண்ணிக்கை தொடர்ந்து அதிகரித்து வரும் நிலையில், செப்டம்பர் மாத விற்பனை கணக்குகள் துறையையே ஆச்சரியப்படுத்தியுள்ளது.

2024 மாடல் மாருதி சுஸுகி டிசையர், புதிய வடிவமைப்பு, மேம்படுத்தப்பட்ட அம்சங்கள், மேலும் 5-ஸ்டார் பாதுகாப்பு மதிப்பீட்டுடன் வெளிவந்தது. இதுவே வாடிக்கையாளர்களை ஈர்த்த முக்கிய காரணமாக அமைந்துள்ளது.

செப்டம்பர் மாத விற்பனை கணக்குப்படி —
 மாருதி டிசையர் – 20,038 கார்கள் விற்பனை
 மாருதி ஸ்விஃப்ட் – 15,547 கார்கள்
 மாருதி வேகன்ஆர் – 15,338 கார்கள்
 மாருதி ஃபிரான்க்ஸ் – 13,767 கார்கள்
 மாருதி பலேனோ – 13,173 கார்கள்
 மாருதி எர்டிகா – 12,115 கார்கள்
 மாருதி பிரெஸ்ஸா – 10,173 கார்கள்

கடந்த ஆண்டு இதே மாதத்தில் 10,853 டிசையர் கார்கள் மட்டுமே விற்பனையாகியிருந்த நிலையில், இம்முறை 20,038 கார்கள் விற்பனையாகி 84.63 சதவீத வளர்ச்சி என்ற சாதனையைப் பதிவு செய்துள்ளது.

மொத்தத்தில், மாருதி சுஸுகி செப்டம்பர் மாதம் 1,32,821 கார்கள் விற்பனை செய்து துறையில் தனது வலிமையை மீண்டும் நிரூபித்துள்ளது. மேலும், சமீபத்தில் அறிமுகமான மாருதி விக்டோரிஸ் 4,261 கார்கள் விற்பனையாகி, 5-ஸ்டார் பாதுகாப்பு மதிப்பீட்டைப் பெற்றுள்ளது.

ரூ.6.25 லட்சம் விலையிலிருந்து தொடங்கும் டிசையர், வாடிக்கையாளர்களிடையே “பயன்பாட்டுக்கும் பாதுகாப்பிற்கும் ஏற்ற கார்” என பெரும் வரவேற்பைப் பெற்றுள்ளது.