சர்வதேச தங்கச் சந்தையில் சீனா தற்போது புதிய பொருளாதார சக்தியாக உருவெடுத்து வருகிறது. தங்கத்தின் விலை உயர்வுக்கும், உலகளாவிய பொருளாதார மாற்றங்களுக்கும் பின்னணியாக சீனாவின் தீவிர கொள்முதல் நடவடிக்கைகள் முக்கிய பங்காற்றி வருவதாக வல்லுநர்கள் எச்சரிக்கின்றனர்.

அப்பல்லோ குளோபல் மேனேஜ்மென்ட் நிறுவனத்தின் தலைமை பொருளாதார நிபுணர் டோர்ஸ்டன் ஸ்லோக் கூறியதாவது –“மத்திய வங்கிகளின் தங்கக் கொள்முதல், ஆர்பிட்ரேஜ் வர்த்தகம், சீனக் குடும்பங்களின் தங்கத் தேவை ஆகியவை தங்கத்தின் விலை உயர்வில் முக்கிய பங்கு வகிக்கின்றன. சீனாவின் தொடர்ச்சியான தங்கக் கொள்முதல் நடவடிக்கைகள் எதிர்காலத்தில் அமெரிக்க டாலரின் ஆதிக்கத்தை சீர்குலைக்கக்கூடும்,” என்றார்.

சீன மக்கள் வங்கி (People’s Bank of China) 2025 ஜனவரி முதல் செப்டம்பர் வரை 39.2 டன் தங்கத்தை வாங்கியுள்ளது.சீனா தற்போது மாதத்திற்கு சராசரியாக 2 முதல் 5 டன் வரை தங்கத்தை சேர்த்துக்கொண்டு வருகிறது.அக்டோபர் 8, 2025 நிலவரப்படி, சீனாவின் மொத்த தங்க இருப்பு 2,298.5 டன் ஆக உயர்ந்துள்ளது.

இந்த வேகமான வளர்ச்சி உலக தங்கச் சந்தையில் பெரிய தாக்கத்தை ஏற்படுத்தி வருகிறது. பொருளாதார நிபுணர்கள் தெரிவிப்பதாவது,“இந்த போக்கு தொடர்ந்தால், அமெரிக்காவின் வர்த்தக மற்றும் நிதி ஆதிக்கம் குறையும். டாலரின் உலகளாவிய ஆட்சி மந்தமடையலாம்,” என்று எச்சரித்துள்ளனர்.

அமெரிக்க டாலர் தற்போது உலகளாவிய நாணயப் பரிமாற்றங்களில் முக்கிய இருப்பு நாணயமாக விளங்கி வருகிறது.
ஆனால், சீனாவின் தங்கக் கையிருப்பு விரிவடைவதால், உலக மத்திய வங்கிகள் டாலரை விட தங்கத்தையே பாதுகாப்பான முதலீடாக கருதும் நிலை உருவாகியுள்ளது.

ஸ்ப்ராட் அசெட் மேனேஜ்மென்ட் நிறுவனத்தின் ETF தயாரிப்பு மேலாண்மை இயக்குநர் ஸ்டீவ் ஸ்காஃப்ஸ்டால் கூறியதாவது –“உலக நாடுகள் தங்கத்தை பொருளாதாரத் தடைகளையும் புவிசார் அரசியல் அபாயங்களையும் தவிர்க்கும் ஒரு வழியாகக் காண்கின்றன. இது தங்கத்தின் நிலையை மேலும் வலுப்படுத்துகிறது,” என்றார்.

2025 ஆம் ஆண்டு தொடக்கத்திலிருந்து தங்கத்தின் விலை 50% வரை உயர்ந்து, தற்போது அவுன்ஸ் ஒன்றுக்கு $4,000 ஐ தாண்டியுள்ளது.
சில நிபுணர்கள் கூறுவதாவது –“தங்கத்தின் விலை 2026க்குள் $5,000, மேலும் 2030க்குள் $10,000 வரை செல்வது சாத்தியம்,” என்று.

இந்த உயர்வால் தங்கச் சுரங்க நிறுவனங்களும் மத்திய வங்கிகளும் பெரும் லாபம் ஈட்டுகின்றன.

இந்தியாவும் தங்கக் கையிருப்பை தொடர்ந்து அதிகரித்து வருகிறது.அக்டோபர் 8, 2025 நிலவரப்படி இந்தியாவின் மொத்த தங்க இருப்பு 880 டன் ஆக உள்ளது.தங்கம் பாதுகாப்பான முதலீடாக இந்திய ரிசர்வ் வங்கியால் கருதப்படுகிறது.

ஒரு காலத்தில் பவுன் தங்கம் ₹70,000க்குக் கீழே இருந்த நிலையில், தற்போது ₹1.25 லட்சத்தை கடந்துள்ளது.இது உலகளாவிய பணவீக்கம், அரசியல் பதட்டம், மற்றும் வட்டி விகிதக் கொள்கைகள் ஆகியவற்றின் நேரடி விளைவாகக் கருதப்படுகிறது.

நிபுணர்கள் கூறுவதாவது –“சீனா, அமெரிக்க டாலரின் மீதான சார்பைக் குறைக்க முயற்சி செய்கிறது. தங்கம் அதன் மாற்று சக்தியாகும். தங்கத்தின் நிலையான மதிப்பு, சீன நாணயத்தின் (யுவான்) சர்வதேச வலிமையை உயர்த்தும்,” என்றனர்.

தற்போது உலக பொருளாதார அமைப்பில், சீனாவின் இந்த தங்கக் கொள்முதல் மூலோபாயம் ஒரு நாணயப் புரட்சிக்கு அடித்தளம் அமைக்கக்கூடியதாக பல நிபுணர்கள் கருதுகின்றனர்.

சீனாவின் தங்கம் குவிக்கும் இந்த வேகம் தொடர்ந்தால்,அடுத்த சில ஆண்டுகளில் “தங்கம் vs டாலர்” என்ற புதிய உலக பொருளாதார போட்டி உருவாகும் வாய்ப்பு அதிகம் என்று வல்லுநர்கள் எச்சரிக்கின்றனர்.