இந்திய கார் சந்தையில் மைக்ரோ எஸ்யூவி பிரிவில் முன்னணியில் இருக்கும் Tata Motors நிறுவனத்தின் Tata Punch கார், 7 லட்சம் யூனிட் விற்பனையை கடந்துள்ளதன் மூலம் புதிய சாதனையை படைத்துள்ளது. 2021 ஆம் ஆண்டு அறிமுகமான இந்த மாடல், ஐந்து ஆண்டுகளுக்குள் இந்த இலக்கை எட்டியது இந்திய வாகன சந்தையில் குறிப்பிடத்தக்க நிகழ்வாக பார்க்கப்படுகிறது.

நகர்ப்புற பயன்பாடு, குடும்ப தேவைகள் மற்றும் உயர்ந்த பாதுகாப்பு அம்சங்கள் என மூன்றையும் சமநிலையாக இணைத்ததே டாடா பஞ்சின் வெற்றிக்கான முக்கிய காரணமாகக் கருதப்படுகிறது. 2021 அக்டோபரில் விற்பனை தொடங்கிய இந்த மைக்ரோ எஸ்யூவி, 2026 ஜனவரி முடிவில் 6,97,433 யூனிட்கள் விற்பனையாகி இருந்தது. தொடர்ந்து பிப்ரவரி தொடக்க நாட்களில் கூடுதல் 2,567 யூனிட்கள் விற்பனையாகி, அதிகாரப்பூர்வமாக 7 லட்சம் மைல்கல்லை எட்டியது.

2026 ஜனவரி மாதம் டாடா பஞ்சுக்கான சிறந்த மாதமாக அமைந்தது. அந்த மாதத்தில் மட்டும் 19,257 யூனிட்கள் விற்பனையாகி, கடந்த ஆண்டை விட 19 சதவிகித வளர்ச்சியை பதிவு செய்தது. இதே காலகட்டத்தில் பஞ்ச் மற்றும் நெக்ஸான் மாடல்கள் இணைந்து, டாடா மோட்டார்ஸின் மாதாந்திர பயணியர் வாகன விற்பனையை 70,222 யூனிட்களாக உயர்த்தியுள்ளன.

இந்த விற்பனை உயர்வுக்கு முக்கிய காரணமாக, ஜனவரி 13-ஆம் தேதி அறிமுகமான புதிய பஞ்ச் ஃபேஸ்லிஃப்ட் மாடல் அமைந்துள்ளது. ரூ.5.59 லட்சம் என்ற ஆரம்ப விலையில் அறிமுகமான இந்த மாடலில், பஞ்ச் EV-யை ஒத்த புதிய இன்டீரியர் வடிவமைப்பு, மேம்படுத்தப்பட்ட வெளிப்புற தோற்றம் மற்றும் பல நவீன வசதிகள் சேர்க்கப்பட்டுள்ளன. முதன்முறையாக டர்போ பெட்ரோல் எஞ்சின் அறிமுகப்படுத்தப்பட்டுள்ளதும் வாடிக்கையாளர்களிடையே கூடுதல் கவனத்தை பெற்றுள்ளது. பெட்ரோல், சிஎன்ஜி மற்றும் எலக்ட்ரிக் என மொத்தம் 33 வேரியண்ட்களில் இந்த கார் கிடைக்கிறது.

பாதுகாப்பு அம்சங்களும் பஞ்ச் வெற்றிக்கு முக்கிய தூணாக விளங்குகின்றன. அறிமுகத்திற்கு முன்பே 5-ஸ்டார் பாதுகாப்பு மதிப்பீட்டை பெற்ற இந்த கார், வாடிக்கையாளர்களின் நம்பிக்கையை பெரிதும் உயர்த்தியது. உயர்ந்த கிரவுண்ட் கிளியரன்ஸ், உயரமான சீட்டிங் பொசிஷன், எளிதான ஏற்றம்–இறக்கம் போன்ற எஸ்யூவி தன்மைகள், குறைந்த விலை மற்றும் உயர் பாதுகாப்பு ஆகியவை இணைந்து, டாடா பஞ்சை ஒரு சாதாரண கார் அல்ல; நம்பகமான குடும்ப எஸ்யூவியாக மாற்றியுள்ளது.

இந்த 7 லட்சம் விற்பனை மைல்கல், இந்திய சந்தையில் டாடா பஞ்ச் பெற்றிருக்கும் வலுவான இடத்தை உறுதி செய்வதோடு, மைக்ரோ எஸ்யூவி பிரிவில் டாடா மோட்டார்ஸின் ஆதிக்கத்தையும் தெளிவாக காட்டுகிறது.