அமெரிக்காவும் இஸ்ரேலும் இணைந்து மேற்கொண்ட இடையறாத தாக்குதல்களின் சூடு உச்சத்தை எட்டிய நிலையில், உலகின் எரிசக்தி நரம்பாக கருதப்படும் ஹார்முஸ் நீரிணையை ஈரான் திடீரென முடக்கியது. இந்த அதிரடி நடவடிக்கை உலக வர்த்தக ஓட்டத்தையே தடுமாறச் செய்தது. வளைகுடா நாடுகளிலிருந்து வெளியேறும் கச்சா எண்ணெய் கப்பல்கள் சிக்கலில் சிக்கியதால், சர்வதேச சந்தைக்கு எண்ணெய் வரத்து கடுமையாக பாதிக்கப்பட்டது.

அதன் விளைவாக கச்சா எண்ணெய் விலை கட்டுப்பாடின்றி பாய்ந்தது. இதன் தாக்கமாக பல நாடுகளில் சமையல் எரிவாயு பற்றாக்குறை, பெட்ரோல் மற்றும் டீசல் விலை வெடிப்புச் சுமையாக உயர்ந்துள்ளது என்று தெரிவிக்கப்படுகிறது.இந்த பரபரப்பான தருணத்தில், அமெரிக்க ஜனாதிபதி டொனால்ட் டிரம்ப், ஹார்முஸ் நீரிணையை உடனடியாக திறக்க ஈரானுக்கு கடும் இறுதி எச்சரிக்கையுடன் காலக்கெடு விதித்தார்.

அந்த நேரக்கெடு இன்று அதிகாலை 5.30 மணியுடன் முடிவடைய இருந்தது. உலகம் பதற்றத்தில் உறைந்திருந்த வேளையில், பாகிஸ்தான் பிரதமர் ஷெபாஸ் ஷெரீப் நடுநிலை முயற்சியில் இறங்கி, அந்த காலக்கெடுவை இரண்டு வாரங்களுக்கு நீட்டிக்க வேண்டுகோள் விடுத்தார். தீவிர ஆலோசனைகளின் பின்னர், தாக்குதலை தற்காலிகமாக நிறுத்த டொனால்ட் டிரம்ப் ஒப்புதல் அளித்ததுடன், இதை அதிகாரப்பூர்வ “போர் நிறுத்தம்” என அறிவித்தார்.

இந்த இரண்டு வார இடைவேளையில், ஹார்முஸ் நீரிணையை திறக்க ஈரான் சம்மதித்துள்ளது. இந்த முக்கிய முன்னேற்றத்திற்கு பாலமாக இருந்த பாகிஸ்தானுக்கு ஈரான் நன்றி தெரிவித்துள்ளது.

மேலும், நீடித்த அமைதிக்கான வழியை உருவாக்கும் வகையில், வரும் ஏப்ரல் 10ஆம் தேதி இஸ்லாமாபாத்தில் முக்கிய அமைதி பேச்சுவார்த்தையை நடத்த பாகிஸ்தான் தீவிரமாக முனைந்துள்ளது.

இதற்கிடையில், இந்த போர் நிறுத்த அறிவிப்பு உலக எண்ணெய் சந்தையில் மின்னல் தாக்கத்தை ஏற்படுத்தியுள்ளது. ஒரு பேரல் கச்சா எண்ணெய் விலை 109 டாலரில் இருந்து 91 டாலர் வரை சரிந்து, சுமார் 20 சதவீத வீழ்ச்சியை பதிவு செய்துள்ளது.

லண்டன் சந்தையில் வர்த்தகமாகும் பிரெண்ட் கச்சா எண்ணெய் விலை 15.21 சதவீதம் குறைந்து 91.93 டாலராக தாழ்ந்துள்ளது. அதேபோல், அமெரிக்க WTI கச்சா எண்ணெய் விலை 16.40 சதவீதம் சரிந்து 91.21 டாலருக்கு வந்துள்ளது.

தற்போதைய வர்த்தகத்தில் WTI 96.43 டாலருக்கும், பிரெண்ட் 94.80 டாலருக்கும் நிலைகொண்டுள்ளது என்று தெரிவிக்கப்படுகிறது.உலக அரசியல், எரிசக்தி சந்தை, பொருளாதாரம் மூன்றையும் ஒரே நேரத்தில் குலுக்கிய இந்த சம்பவம், அடுத்த கட்ட அமைதி பேச்சுவார்த்தைகளில் எந்த திருப்பத்தை எடுக்கும் என்பது உலகின் கவனத்தை ஈர்த்துள்ளது.