ஈரானுக்கு எதிரான தாக்குதல்களை தற்காலிகமாக நிறுத்தும் அமெரிக்காவின் தீர்மானத்திற்கு இஸ்ரேல் அரசு வெளிப்படையான ஆதரவை தெரிவித்துள்ளது.

இதுகுறித்து இஸ்ரேல் பிரதமர் பெஞ்சமின் நெதன்யாகு அலுவலகம் வெளியிட்ட அறிக்கையில், “ஹார்முஸ் நீரிணையை உடனடியாக திறந்து, அமெரிக்கா, இஸ்ரேல் மற்றும் பிராந்திய நாடுகளின் மீது நடைபெறும் அனைத்து தாக்குதல்களையும் நிறுத்த வேண்டும் என்ற நிபந்தனைகளின் அடிப்படையில், ஈரான் மீது மேற்கொள்ளப்பட்ட தாக்குதல்களை இரண்டு வாரங்களுக்கு இடைநிறுத்தும் அமெரிக்க ஜனாதிபதி டொனால்ட் டிரம்ப் அவர்களின் முடிவை இஸ்ரேல் முழுமையாக ஆதரிக்கிறது.

மேலும், ஈரான் இனி அமெரிக்கா, இஸ்ரேல் மற்றும் அண்டை அரபு நாடுகள் மட்டுமின்றி உலகளாவிய அமைதிக்கும் அணு, ஏவுகணை மற்றும் பயங்கரவாத அச்சுறுத்தலாக மாறாதபடி உறுதி செய்யும் அமெரிக்காவின் முயற்சிகளுக்கும் இஸ்ரேல் உறுதுணையாக நிற்கிறது” என்று தெரிவிக்கப்படுகிறது.

இருப்பினும், ஈரானின் ஆதரவைப் பெற்றுள்ள ஹிஸ்புல்லா அமைப்பின் அச்சுறுத்தலை முற்றிலும் ஒழிக்கும் நோக்கில், தெற்கு லெபனானில் இஸ்ரேல் தனது ராணுவ நடவடிக்கைகளை தொடர்ந்து தீவிரப்படுத்தும் என்றும் அந்த அறிக்கையில் குறிப்பிடப்பட்டுள்ளது. இந்த இரண்டு வார இடைக்கால போர் நிறுத்தம் லெபனானை உட்படுத்தாது என்றும் தெளிவாக தெரிவிக்கப்படுகிறது.

இதற்கிடையில், அமெரிக்க தரப்பில் இருந்து வெளியான தகவல்களில், “ஈரானில் முக்கியமான ராணுவ இலக்குகள் அனைத்தும் ஏற்கனவே அடையப்பட்டுள்ளன. மேலும், நீண்டகால அமைதி மற்றும் மத்திய கிழக்கில் நிலையான சமாதானத்தை உருவாக்கும் ஒப்பந்தத்திற்கான பேச்சுவார்த்தைகளில் குறிப்பிடத்தக்க முன்னேற்றம் ஏற்பட்டுள்ளது.

ஈரானிடமிருந்து 10 அம்சங்களை கொண்ட முன்மொழிவு கிடைத்துள்ளது. அது பேச்சுவார்த்தைக்கு வலுவான அடித்தளமாக அமையும் என்று நாங்கள் நம்புகிறோம்.அமெரிக்கா மற்றும் ஈரான் இடையேயான பழைய கருத்து வேறுபாடுகளில் பல முக்கிய அம்சங்களில் புரிதல் உருவாகியுள்ளது. இருப்பினும், இந்த ஒப்பந்தத்தை முழுமையாக நிறைவேற்றுவதற்கு மேலும் இரண்டு வார கால அவகாசம் அவசியமாகிறது” என்று தெரிவிக்கப்படுகிறது.