தமிழக அரசியல் களம் 2026 சட்டமன்றத் தேர்தலை நோக்கி நகர்ந்து கொண்டிருக்கும் வேளையில், சினிமாத் திரையிலும் அரசியல் அனல் பறக்கத் தொடங்கியுள்ளது. இயக்குநர் உமாபதி ராமைய்யா இயக்கத்தில், நடிகர் நட்டி நடராஜன் நடிப்பில் உருவாகியுள்ள 'டிஎன் 2026' (TN 2026) திரைப்படத்தின் டீசர் சமீபத்தில் வெளியாகி, சமூக வலைதளங்களில் பெரும் விவாதத்தை ஏற்படுத்தியுள்ளது. குறிப்பாக, தமிழக வெற்றிக் கழகத்தின் (தவெக) தலைவர் விஜய்யின் நிஜ வாழ்க்கை அரசியலைச் சித்தரிப்பது போன்ற காட்சிகள் இடம்பெற்றுள்ளதாகக் கூறி, விஜய் ரசிகர்கள் இப்படத்திற்கு எதிராகக் குரல் எழுப்பி வருகின்றனர்.

டீசரில் இடம்பெற்ற சர்ச்சை 

முழுநீள அரசியல் திரைப்படமாக உருவாகியுள்ள 'டிஎன் 2026'-ல், ஒரு முன்னணி சினிமா நடிகர் அரசியல் கட்சி ஆரம்பித்துத் தேர்தலில் போட்டியிடுவதே கதைக் கருவாக அமைக்கப்பட்டுள்ளது. இதில் நாயகன் நட்டி நடராஜனின் தோற்றம், மேடைப் பேச்சுகள் மற்றும் டீசரில் இடம்பெற்ற சில வசனங்கள் தவெக தலைவர் விஜய்யை அச்சுப்பிசகாமல் பிரதிபலிப்பதாக ரசிகர்கள் கருதுகின்றனர். குறிப்பாக, "சினிமாவில் இருந்து வருபவர்கள் எல்லாம் நாட்டை ஆள முடியாது" என்பது போன்ற விமர்சனக் காட்சிகள், விஜய்யைத் தரம் தாழ்த்திச் சித்தரிக்க முயல்வதாக அவர்கள் குற்றம் சாட்டுகின்றனர்.

இயக்குநரின் விளக்கமும் ரசிகர்களின் எச்சரிக்கையும்:

சர்ச்சை வலுக்கவே, இயக்குநர் உமாபதி ராமைய்யா செய்தியாளர்களைச் சந்தித்து விளக்கம் அளித்தார். "நான் நடிகர் விஜய்யின் தீவிர ரசிகன். அவரை இழிவுபடுத்தும் நோக்கத்தில் இந்தப் படம் எடுக்கப்படவில்லை. இது ஒரு கற்பனையான அரசியல் கதை," என்று அவர் தெரிவித்தார். இருப்பினும், டீசரில் ஆளும் கட்சியைத் தாக்கும் வசனங்களும், சினிமா நடிகர்களை விமர்சிக்கும் காட்சிகளும் கலந்திருப்பதால், இது திட்டமிட்டு தேர்தலுக்கு முன்னதாகக் குழப்பத்தை விளைவிக்க எடுக்கப்பட்ட முயற்சி என விஜய் ரசிகர்கள் சமூக வலைதளங்களில் பதிவிட்டு வருகின்றனர்.

ஒருவேளை படத்தில் விஜய்யை மறைமுகமாகத் தாக்கும் காட்சிகள் இருந்தால், தியேட்டர்களில் படம் ஓடாது என்றும், படக்குழுவினர் கடுமையான பின்விளைவுகளைச் சந்திக்க நேரிடும் என்றும் ரசிகர்கள் எச்சரித்துள்ளனர். ஏப்ரல் 10-ஆம் தேதி திரையரங்குகளில் வெளியாகவுள்ள இப்படம், தேர்தல் நேரத்தில் எந்தளவுக்கு அரசியல் தாக்கத்தை ஏற்படுத்தும் என்பது எதிர்பார்ப்பை அதிகரித்துள்ளது. ஏற்கனவே அரசியல் மற்றும் சினிமா இரண்டிலும் உச்சத்தில் இருக்கும் விஜய்க்கு ஆதரவாக அவரது ரசிகர்கள் எடுத்துள்ள இந்த ஆவேசமான நிலைப்பாடு, 'டிஎன் 2026' படத்திற்கு ஒருவித நெருக்கடியை உருவாக்கியுள்ளது.