பாகிஸ்தான் நாடு கடுமையான பொருளாதார நெருக்கடியில் சிக்கித் தவித்து வரும் நிலையிலும், இந்தியாவை எந்நேரமும் கண்காணிக்கும் நோக்கில் மிகக் குறுகிய காலத்திற்குள் 6 புதிய செயற்கைக்கோள்களை விண்ணில் ஏவியுள்ள விவகாரம் சர்வதேச பாதுகாப்பு வட்டாரத்தில் பெரும் அதிர்வலைகளை ஏற்படுத்தியுள்ளது.

சுபார்கோவின் திடீர் வேகம்
பாகிஸ்தானின் விண்வெளி ஆராய்ச்சி நிறுவனமான ‘சுபார்கோ’ (SUPARCO) கடந்த 1961-ஆம் ஆண்டு தொடங்கப்பட்டது. அதுமுதல் கடந்த பல தசாப்தங்களாக அந்த நாடு ஒட்டுமொத்தமாகவே வெறும் 9 செயற்கைக்கோள்களை மட்டுமே விண்ணில் செலுத்தியிருந்தது. ஆனால், தற்போதைய கடுமையான நிதி நெருக்கடிக்கு மத்தியிலும், கடந்த 2025 ஜனவரி முதல் நடப்பு 2026 ஜூன் வரையிலான காலகட்டத்தில் மட்டும் 6 அதிநவீன புவி கண்காணிப்பு செயற்கைக்கோள்களை (Earth Observation Satellites) பாகிஸ்தான் அடுத்தடுத்து ஏவியுள்ளது.

வழக்கத்திற்கு மாறான சாய்ந்த சுற்றுப்பாதை (Inclined Orbits)
பொதுவாக, புவி கண்காணிப்பு செயற்கைக்கோள்கள் ஒட்டுமொத்த பூமியையும் படம் பிடிப்பதற்காகத் துருவங்களைச் சுற்றி வரும் 'சன் சின்க்ரோனஸ்' (Sun-Synchronous Orbit) பாதையில்தான் நிலைநிறுத்தப்படும். ஆனால், பாகிஸ்தானின் இந்த 6 புதிய செயற்கைக்கோள்களும் வழக்கத்திற்கு மாறாகச் சாய்ந்த சுற்றுப்பாதையில் (Inclined Orbits) நிலைநிறுத்தப்பட்டுள்ளன என்று அமெரிக்காவின் விண்வெளி ஆய்வு அமைப்பான ‘காம்ஸ்பாக்’ (COMSPOC) உறுதிப்படுத்தியுள்ளது.

இந்தியாவே இலக்கு: இந்தச் சாய்ந்த சுற்றுப்பாதையின் மூலம், அந்தச் செயற்கைக்கோள்கள் உலகெங்கும் சுற்றாமல், துல்லியமாக இந்திய நிலப்பரப்பிற்கு மேல் மட்டுமே தொடர்ச்சியாகச் சுழலும் வண்ணம் வடிவமைக்கப்பட்டுள்ளன. இதன் மூலம், ஜம்மு-காஷ்மீர் எல்லை உட்பட இந்தியாவின் எந்தவொரு முக்கியப் பகுதியையும் இரண்டு நாட்களுக்கு ஒருமுறை பாகிஸ்தானால் மிகத் துல்லியமாகப் படம் பிடித்துக் கண்காணிக்க முடியும்.

சீனாவின் பின்னணியும் AI தொழில்நுட்பமும்
இந்தச் செயற்கைக்கோள்கள் அனைத்தும் சீனாவின் விண்வெளி ஏவுதளங்களில் இருந்தே விண்ணில் செலுத்தப்பட்டுள்ளன என்பது இரு நாடுகளின் கூட்டுச் சதியை அம்பலப்படுத்தியுள்ளது. மேலும், இந்தச் சாதனங்களில் பொருத்தப்பட்டுள்ள செயற்கை நுண்ணறிவு (AI) தொழில்நுட்பம், எடுக்கும் அதிநவீன புகைப்படங்களைச் சில நொடிகளிலேயே தானாகப் பகுப்பாய்வு செய்து, எல்லைகளில் உள்ள இந்திய ராணுவத்தின் நடமாட்டங்களை உடனுக்குடன் பாகிஸ்தான் ராணுவத் தலைமையகத்திற்கு அனுப்பி வைக்கும் திறன் கொண்டது.

வேளாண்மை மற்றும் பேரிடர் மேலாண்மைக்காகவே இவை ஏவப்பட்டதாகப் பாகிஸ்தான் அதிகாரப்பூர்வமாகத் தற்காப்பு வாதம் செய்தாலும், இது அண்டை நாடுகளான சீனா மற்றும் பாகிஸ்தானின் கூட்டு ராணுவ உளவுத் திட்டத்தின் (Military Spying Project) ஒரு பகுதியே என்று பாதுகாப்பு வல்லுநர்கள் எச்சரிக்கின்றனர்.