அமெரிக்காவில் H-1B விசா திட்டத்தைச் சுற்றியுள்ள விவாதம் தற்போது அதிகரித்து வருகிறது. தீவிர வலதுசாரி ஆதரவாளர்கள் இந்த விசா திட்டத்தை முழுமையாக ரத்து செய்ய வேண்டும் என வலியுறுத்துகின்றனர். அவர்களது வாதம் – H-1B விசா காரணமாகவே அமெரிக்கர்களுக்கு வேலை வாய்ப்புகள் குறைந்து வருகின்றன என்பதுதான். இதற்கு எதிராக அமெரிக்காவின் முக்கிய தொழிலதிபர்கள் இந்த திட்டத்தைத் தொடர்ந்து ஆதரித்து வருகின்றனர்.

இந்த சூழலில், முன்னாள் டிரம்ப் ஆதரவாளரான எலான் மஸ்க், சமீபத்தில் H-1B விசா தொடர்பான தனது புதிய கருத்துகளைப் பகிர்ந்து கவனம் ஈர்த்துள்ளார். இந்திய டிரேடிங் நிறுவனம் ஜெரோதா இணை நிறுவனர் நிகில் காமத்துடன் பேசிய போது, H-1B விசா அமெரிக்காவிற்கு அவசியமான ஒன்று என்று மஸ்க் வலியுறுத்தினார்.

அவருடைய கருத்து – இந்தியர்களைப் போன்ற திறமையான நிபுணர்களால் அமெரிக்க தொழில்நுட்பத் துறை பெரிதும் வளர்ச்சி பெற்றுள்ளது. திறமையான மனிதவளத்தின் பற்றாக்குறை அமெரிக்காவில் எப்போதும் காணப்படும் பிரச்சினை என்பதால், H-1B போன்ற திட்டங்கள் தேவையானவை என அவர் கூறினார்.

H-1B விசா திட்டத்தில் முறைகேடுகள் நடந்துள்ளன என்பதை அவர் ஒப்புக் கொண்டார். குறிப்பாக அவுட்சோர்சிங் நிறுவனங்கள் சில குறைபாடுகளை பயன்படுத்தியதாகவும், இதனால் கடந்த கால அரசுகள் கொள்கைகளை கடுமையாக்கியதாகவும் மஸ்க் குறிப்பிடுகிறார். ஆனால், சில குறைபாடுகளுக்காக முழுத் திட்டத்தையும் ரத்து செய்வது தவறு என அவர் வலியுறுத்தினார்.

அவரது சொற்களில்:
“திறமையானவர்களின் பற்றாக்குறை உண்மையாக உள்ளது. மிக சிக்கலான பணிகளைச் செய்யத் தேவையான நிபுணர்களைக் கண்டுபிடிப்பது எங்களுக்குச் சிரமமாகிறது. எனவே திறமையான வெளிநாட்டு ஊழியர்கள் அமெரிக்காவுக்கு வருவது நல்லதே.”

டெஸ்லா, SpaceX, X, xAI போன்ற முன்னணி நிறுவனங்களை நடத்தி வரும் மஸ்க், உலகின் மிக திறமையான நபர்களைத் தனது நிறுவனங்களில் சேர்ப்பதையே அடிப்படையாகக் கொண்டு செயல்படுவதாக கூறினார்.

இந்த விவாதம் நடைபெறும் நேரத்தில், H-1B விசா கட்டண உயர்வு குறித்த டிரம்ப் எடுத்த நடவடிக்கையும் மீண்டும் பேசப்படுகிறது. முன்பு $5,000 இருந்த விசா விண்ணப்ப கட்டணம், டிரம்ப் காலத்தில் $100,000 ஆக உயர்த்தப்பட்டது. இதனால் இந்தியர்கள் அதிகம் பாதிக்கப்பட்டனர். இதற்கு பிறகும், H-1B திட்டத்தை முழுவதும் ரத்து செய்வதற்கான திட்டம் டிரம்ப் நிர்வாகத்திற்கு இல்லை என்பதும் குறிப்பிடத்தக்கது.

H-1B விசா மூலம் இந்தியா, சீனா உள்ளிட்ட நாடுகளிலிருந்து பலர் அமெரிக்காவுக்கு குடியேறி வேலை வாய்ப்பைப் பெற்று வருகின்றனர். இந்த விண்ணப்ப திட்டம் தொழில்நுட்பத் துறைக்கும், உயர் திறன்கள் கொண்ட வெளிநாட்டினருக்கும் அமெரிக்காவில் குடியேறும் வாய்ப்பையும் உருவாக்குகிறது.

தற்போதைய அரசியல் சூழலில் H-1B விசா திட்டம் தொடருமா, மாற்றப்படுமா என்பது அமெரிக்காவில் பெரிய விவாதமாக மாறியுள்ளது. திறமையான பணியாளர்கள் தேவையென தொழில் நிறுவனங்கள் வலியுறுத்த, அமெரிக்க வேலைவாய்ப்புகள் குறைவு என வலதுசாரிகள் எதிர்ப்பைத் தொடர, இந்த விவாதம் இன்னும் சில நாட்களுக்கு முற்றுப்புள்ளி கொள்ளாத நிலைதான் தொடரும் என்று கருதப்படுகிறது.