மேற்கு ஆப்பிரிக்க நாடான நைஜீரியாவின் கானோ மாகாணத்தில் உள்ள குவானர் பார்டே நகரை அண்மித்த நெடுஞ்சாலையில் இன்று காலை பயங்கரமான சாலை விபத்து ஒன்று நடந்தது. பல பயணிகள் மற்றும் சரக்குகளை ஏற்றிச் சென்ற டிரெய்லர் லாரி வேகமாக பயணித்துக் கொண்டிருந்தபோது, திடீரென டிரைவரின் கட்டுப்பாட்டை இழந்து தடுமாறி கவிழ்ந்தது.

கணநேரத்தில் நடந்த இந்த விபத்து அப்பகுதியில் அதிர்ச்சியையும் பரபரப்பையும் ஏற்படுத்தியது.லாரியில் பயணம் செய்தவர்களில் 30 பேர் சம்பவ இடத்திலேயே உயிரிழந்தனர்.

பலர் கடுமையாக காயமடைந்து சாலையோரத்தில் உதவி கோரி தவித்தனர். தகவல் கிடைத்தவுடன் மீட்புப் படையினர் விரைந்து வந்து காயமடைந்தவர்களை மீட்டு அருகிலுள்ள மருத்துவமனைகளில் சேர்த்தனர்.

அவர்களில் சிலரது நிலைமை கவலைக்கிடமாக இருப்பதாக மருத்துவர்கள் தெரிவித்ததால், பலி எண்ணிக்கை மேலும் அதிகரிக்கும் என்ற அச்சம் நிலவுகிறது.முதற்கட்ட போலீஸ் விசாரணையில், அதிக வேகத்தில் சென்ற லாரி டிரைவரின் கட்டுப்பாட்டை இழந்ததே விபத்திற்குக் காரணம் என தெரியவந்துள்ளது.

இதற்கிடையில், நைஜீரியாவில் மோசமான சாலை வசதிகள், பாதுகாப்பு குறைபாடுகள் மற்றும் போக்குவரத்து விதிகள் முறையாக அமல்படுத்தப்படாதது போன்ற காரணங்களால் சாலை விபத்துகள் தொடர்ந்து அதிகரித்து வருவதாக பொதுமக்கள் குற்றம் சாட்டுகின்றனர்.

மேலும், ஒரே விபத்தில் பல உயிர்கள் பறிபோன இந்த சம்பவம் அப்பகுதி மக்களிடையே பெரும் சோகத்தை ஏற்படுத்தியுள்ளது.