தென் அமெரிக்க நாடான வெனிசுலாவிலிருந்து அமெரிக்காவுக்குள் போதைப்பொருள் கடத்தல் நடைபெற்று வருவதாக நீண்ட காலமாக குற்றச்சாட்டு முன்வைத்து வந்தார் அமெரிக்க அதிபர் டொனால்டு டிரம்ப். இந்த போதைப்பொருள் கடத்தல், அமெரிக்க இளைஞர்களை அடிமைத்தனத்தில் தள்ளும் அபாயகரமான நிலையை உருவாக்கியுள்ளதாகவும் அவர் குற்றம் சாட்டினார்.

மேலும், இந்த சட்டவிரோத நடவடிக்கைகளுக்கு வெனிசுலா அதிபர் நிக்கோலஸ் மதுரோ நேரடியாக உடந்தையாக இருப்பதாகவும் டிரம்ப் பகிரங்கமாக குற்றம்சாட்டினார்.இந்த குற்றச்சாட்டுகளின் பின்னணியில், வெனிசுலா கடற்பகுதியில் அமெரிக்க கடற்படை தீவிர ரோந்து பணியில் ஈடுபட்டது.

அப்போது, வெனிசுலாவிலிருந்து போதைப்பொருள் கடத்தி வந்ததாக சந்தேகிக்கப்பட்ட பல கப்பல்கள் மீது அமெரிக்க கடற்படை தாக்குதல் நடத்தி அவற்றை சுட்டு வீழ்த்தியது. இதற்கு கடும் கண்டனம் தெரிவித்த வெனிசுலா அதிபர் நிக்கோலஸ் மதுரோ, “அமெரிக்காவின் ஏகாதிபத்திய தலையீட்டை முறியடிப்போம்” என கடும் எச்சரிக்கை விடுத்தார்.

இந்த பதற்றமான சூழலில், வெனிசுலாவின் தலைநகர் கராகஸ் நகரில் இன்று அதிகாலை சுமார் 2 மணியளவில், ஏழு முக்கிய இடங்களை குறிவைத்து அமெரிக்க ராணுவம் வான்வழி தாக்குதலை நடத்தியதாக தகவல்கள் வெளியாகின.

இந்த தாக்குதலில் ஏற்பட்ட உயிரிழப்புகள் குறித்து அதிகாரப்பூர்வ தகவல்கள் இன்னும் வெளியாகவில்லை. இருப்பினும், தாக்குதலின் விளைவாக வெனிசுலா ராணுவ தளங்களுக்கு அருகிலுள்ள பகுதிகளில் மின்சாரம் துண்டிக்கப்பட்டுள்ளதாக கூறப்படுகிறது. இதனைத் தொடர்ந்து, நாட்டில் அவசர நிலை பிரகடனம் செய்யப்படுவதாகவும் அறிவிக்கப்பட்டுள்ளது.

இந்த நிலையில், உலக அரசியலை அதிரவைக்கும் வகையில், வெனிசுலா அதிபர் நிக்கோலஸ் மதுரோவும் அவரது மனைவியும் கைது செய்யப்பட்டு நாடு கடத்தப்பட்டுள்ளதாக டொனால்டு டிரம்ப் அதிரடியாக அறிவித்துள்ளார். இது தொடர்பாக அவர் சமூக வலைதளத்தில் வெளியிட்ட பதிவில்,“வெனிசுலா மீது அமெரிக்கா வெற்றிகரமான ராணுவ நடவடிக்கையை மேற்கொண்டுள்ளது.

அதிபர் நிக்கோலஸ் மதுரோவும், அவரது மனைவியும் கைது செய்யப்பட்டு நாடு கடத்தப்பட்டுள்ளனர். இந்த நடவடிக்கை அமெரிக்க சட்ட அமலாக்க அமைப்புகளின் முழு ஒத்துழைப்புடன் மேற்கொள்ளப்பட்டது”என்று தெரிவித்துள்ளார்.