சென்னை வானிலை ஆய்வு மையம் வெளியிட்டுள்ள புதிய அறிவிப்பில், தமிழகத்தில் மீண்டும் மழைத் தாக்கம் அதிகரிக்க வாய்ப்புள்ளதாக தெரிவித்துள்ளது.

குமரிக்கடல் மற்றும் அதனை ஒட்டிய பகுதிகளில் உருவாகியுள்ள வளிமண்டல கீழடுக்கு சுழற்சி காரணமாக, இன்று (12-01-2026) தமிழகத்தின் பல பகுதிகள் மழையின் பிடியில் சிக்கக்கூடும்.

இதன்படி, தமிழகத்தின் சில இடங்களிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்யும் என கணிக்கப்பட்டுள்ளது.

குறிப்பாக தஞ்சாவூர், திருவாரூர், நாகப்பட்டினம்,கடலூர், அரியலூர், மயிலாடுதுறை  மற்றும் புதுக்கோட்டை மாவட்டங்களில் ஓரிரு இடங்களில் கனமழை கொட்ட வாய்ப்பு இருப்பதாக வானிலை ஆய்வு மையம் எச்சரிக்கை விடுத்துள்ளது.

காரைக்கால் பகுதிகளிலும் பலத்த மழைக்கு சாத்தியம் உள்ளது.நாளை (13-01-2026) தென் தமிழகத்தின் சில பகுதிகளிலும், வட தமிழகத்தின் ஓரிரு மாவட்டங்களிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய மழை தொடரும் என தெரிவிக்கப்பட்டுள்ளது.

இதனைத் தொடர்ந்து, நாளை மறுநாள் (14-01-2026) தமிழகத்தின் ஓரிரு இடங்களில் மட்டும் லேசானது முதல் மிதமான மழை பெய்யக்கூடும் என்றும் கூறப்பட்டுள்ளது.ஆனால், 15-01-2026 முதல் 18-01-2026 வரை தமிழகம், புதுவை மற்றும் காரைக்கால் பகுதிகளில் மழை ஓய்ந்து, வறண்ட வானிலை நிலவும் எனவும் வானிலை ஆய்வு மையம் தெரிவித்துள்ளது.

இதற்கிடையில், சென்னை மற்றும் அதன் புறநகர் பகுதிகளில் இன்று (12-01-2026) வானம் மேகமூட்டத்துடன் காணப்படும். நகரின் சில பகுதிகளில் திடீர் மழை பெய்யக்கூடும். அதிகபட்ச வெப்பநிலை 26 டிகிரி செல்சியஸ் அளவிலும், குறைந்தபட்ச வெப்பநிலை 21–22 டிகிரி செல்சியஸ் அளவிலும் இருக்கும் என கணிக்கப்பட்டுள்ளது.

நாளை (13-01-2026) சென்னை மற்றும் புறநகர் பகுதிகளில் வானம் மேகமூட்டத்துடன் காணப்படும். அதிகபட்ச வெப்பநிலை 26–27 டிகிரி செல்சியஸ் வரையிலும், குறைந்தபட்ச வெப்பநிலை 21 டிகிரி செல்சியஸ் அளவிலும் இருக்கும் என தெரிவிக்கப்பட்டுள்ளது.