பிரபல குறுஞ்செய்தி செயலியான வாட்ஸ்அப் (WhatsApp), பயனர்கள் தங்களின் தொடர்புகளை எளிதாகவும் விரைவாகவும் கண்டறியும் வகையில் பிரத்யேகமாக 'காண்டாக்ட்ஸ்' (Contacts) எனும் புதிய அம்சத்தை உருவாக்கி வருகிறது. ஆண்ட்ராய்டு பயனர்களுக்காகத் தயாராகி வரும் இந்த புதிய அம்சத்தில் பல நவீன வசதிகள் இடம்பெறவுள்ளன.

பிரத்யேக காண்டாக்ட்ஸ் திரை: WABetaInfo தகவலின்படி, பயனர்களின் அனைத்துத் தொடர்புகளையும் ஒரே திரையில் கொண்டுவரும் வகையில் இந்த 'காண்டாக்ட்ஸ்' பகுதி வடிவமைக்கப்பட்டு வருகிறது. இதில் பெயர், தொலைபேசி எண் அல்லது பயனர் பெயர் (Username) மூலம் நபர்களை உடனடியாகத் தேட பிரத்யேக சர்ச் பார் (Search bar) வசதி வழங்கப்படவுள்ளது.

பச்சை நிற ஆன்லைன் குறியீடு: உங்கள் தொடர்பில் உள்ள ஒரு நபர் வாட்ஸ்அப்பில் ஆன்லைனில் இருக்கும்போது, அவர்களின் சுயவிவரப் படத்திற்கு (Profile Picture) அருகில் பச்சை நிறப் புள்ளி (Green Dot) தோன்றும். ஆஃப்லைனில் உள்ளவர்களுக்கு அவர்களின் 'லாஸ்ட் சீன்' (Last Seen) விவரம் காட்டப்படும்.

பிறந்தநாள் நினைவூட்டல் (Birthday Reminders): காண்டாக்ட்ஸ் பட்டியலில் உங்கள் நண்பர்களுக்குப் பிறந்தநாள் வரும் நாளில், அவர்களின் பெயருக்கு அருகில் 'இன்று பிறந்தநாள்' என்ற தகவலுடன் கேக் எமோஜியும் (Cake Emoji) தோன்றும். இதன் மூலம் தனிப்பட்ட சாட்களைச் சரிபார்க்காமலேயே பயனர்கள் உடனடியாக வாழ்த்துகளைத் தெரிவிக்க முடியும்.

வரிசைப்படுத்தும் வசதி (Sorting Options): காண்டாக்ட்ஸ் பட்டியலை அகரவரிசைப்படியோ (Alphabetical) அல்லது செயல்பாட்டின் அடிப்படையிலோ (Activity-based) வரிசைப்படுத்தலாம். செயல்பாட்டின் அடிப்படையில் வரிசைப்படுத்தும்போது, தற்போது ஆன்லைனில் இருக்கும் நபர்கள் பட்டியலின் மேற்பகுதியில் காட்டுவார்கள்.

மெட்டா ஏ.ஐ மற்றும் அழைப்பு வசதி: இந்தப் பட்டியலின் கீழ் பகுதியில் மெட்டா ஏ.ஐ (Meta AI) உடன் உரையாடுவதற்கான குறுக்குவழியும், வாட்ஸ்அப் பயன்படுத்தாத நபர்களுக்கு அழைப்பு இணைப்பு அனுப்ப 'நண்பரை அழைக்கவும்' (Invite a friend) என்ற விருப்பமும் இடம்பெறவுள்ளது.

தற்போது மேம்பாட்டு நிலையில் (Under Development) உள்ள இந்த அம்சம், விரைவில் ஆண்ட்ராய்டு பீட்டா சோதனையாளர்களுக்குப் பரிசோதனைக்குக் கொண்டுவரப்பட்டு, பின்னர் அனைத்துப் பயனர்களுக்கும் அதிகாரப்பூர்வமாக வெளியாகும் என எதிர்பார்க்கப்படுகிறது.