சென்னை குரோம்பேட்டை ஜிஎஸ்டி சாலையில் டாரஸ் லாரியில் சிக்கி இருசக்கர வாகனத்தில் சென்ற திருவாரூரைச் சேர்ந்த 23 வயது இளம்பெண் சம்பவ இடத்திலேயே பரிதாபமாக உயிரிழந்தார். அவருடன் பயணித்த தோழி அதிர்ஷ்டவசமாக லேசான காயங்களுடன் உயிர் தப்பினார்.

தாம்பரத்திலிருந்து வேளச்சேரி நோக்கி நேற்றிரவு டாரஸ் லாரி ஒன்று சென்று கொண்டிருந்தது. குரோம்பேட்டை ரேடியல் சாலை மேம்பாலம் அருகே லாரி சென்றுகொண்டிருந்த போது, அப்பகுதியில் உள்ள சர்வீஸ் சாலையிலிருந்து இரண்டு பெண்கள் இருசக்கர வாகனத்தில் வந்து பிரதான சாலையைக் கடக்க முயன்றதாகக் கூறப்படுகிறது. அப்போது எதிர்பாராதவிதமாக இருசக்கர வாகனம் லாரியின் அருகே சென்ற நிலையில், லாரியில் சிக்கி விபத்துக்குள்ளானது.

இவ்விபத்தில் இருசக்கர வாகனத்தில் சென்ற இளம்பெண் லாரியில் சிக்கி பலத்த காயமடைந்து சம்பவ இடத்திலேயே உயிரிழந்தார். உடன் சென்ற மற்றொரு பெண் லேசான காயங்களுடன் தப்பினார். விபத்து குறித்துத் தகவலறிந்த குரோம்பேட்டை போக்குவரத்து புலனாய்வுப் பிரிவு காவல்துறையினர் சம்பவ இடத்திற்கு விரைந்து சென்று விசாரணை நடத்தினர். மேலும், உயிரிழந்த பெண்ணின் உடலைக் கைப்பற்றி, உடற்கூறாய்வுக்காகத் தாம்பரம் அரசு மாவட்ட மருத்துவமனைக்கு அனுப்பி வைத்தனர்.

காவல்துறையினரின் முதற்கட்ட விசாரணையில், உயிரிழந்தவர் திருவாரூர் மாவட்டம் மஞ்சக்குடி அருகே உள்ள கீழ் உத்தரங்குடியைச் சேர்ந்த ஜமுனா (23) என்பதும், காயமடைந்தவர் மயிலாடுதுறை மாவட்டம் வரதம்பட்டு பகுதியைச் சேர்ந்த ஸ்ரீஜா (22) என்பதும் தெரியவந்தது.

இச்சம்பவம் தொடர்பாகக் குரோம்பேட்டை போக்குவரத்து புலனாய்வுப் பிரிவு காவல்துறையினர் வழக்குப் பதிவு செய்து விசாரணை நடத்தி வருகின்றனர். விபத்து நடந்தபோது லாரி மற்றும் இருசக்கர வாகனம் பயணித்த நிலை, சாலையைக் கடக்க முயன்ற போது ஏற்பட்ட சூழல் ஆகியவை குறித்துக் கண்காணிப்பு கேமரா (CCTV) காட்சிகளைச் சேகரித்து ஆய்வு செய்து வருகின்றனர்.