ராமநாதபுரம் அருகே மோசடி கும்பலுக்கு தனது வங்கி கணக்கை பயன்படுத்த அனுமதித்து, அதற்காக கமிஷன் தொகை பெற்றதாக கூறப்படும் வாலிபரை காவலர்கள் கைது செய்துள்ளனர். மோசடி பணத்தை கிரிப்டோ நாணயமாக மாற்றி மீண்டும் மோசடி கும்பலுக்கு அனுப்பியதாகவும் விசாரணையில் தெரியவந்துள்ளது.

ராமநாதபுரம் மாவட்டத்தில் இணையவழி மோசடி சம்பவங்கள் தொடர்ந்து அதிகரித்து வருகின்றன. மோசடியில் ஈடுபடும் கும்பல்கள் தங்களது பணப்பரிமாற்ற நடவடிக்கைகளை மறைப்பதற்காக, பிறரின் வங்கி கணக்குகளை பணம் கொடுத்து பயன்படுத்தும் நடைமுறையை கையாள்வதாக கூறப்படுகிறது.

வங்கி கணக்கு வைத்திருப்பவர்களுக்கு குறிப்பிட்ட தொகையை கமிஷனாக வழங்கி, அந்த கணக்குகள் மூலம் மோசடி பணத்தை பரிமாற்றம் செய்து வருவதாகவும் தெரிவிக்கப்படுகிறது. இதுபோன்ற நடவடிக்கைகளை இணையவழி குற்றப்பிரிவு காவலர்கள் தீவிரமாக கண்காணித்து வருகின்றனர்.மோசடி கும்பல்களிடம் இருந்து பெறப்படும் பணத்தை சிலர் தங்களது வங்கி கணக்குகளில் செலுத்தி, பின்னர் பணப்பற்று அட்டை மூலம் எடுத்துக்கொள்வதாக கூறப்படுகிறது.

அதன் பின்னர் அந்த பணத்தை கிரிப்டோ நாணயமாக மாற்றி, மோசடியில் ஈடுபடும் நபர்களுக்கு அனுப்பும் செயல்களும் நடைபெற்று வருவதாக காவலர்கள் தெரிவித்துள்ளனர். இதுபோன்ற குற்றச்செயல்களில் தொடர்புடையவர்களை கண்டறிந்து காவலர்கள் தொடர்ந்து கைது செய்து வருகின்றனர்.

இந்த நிலையில், காவல்துறை உயர் அதிகாரியின் உத்தரவின்பேரில், சென்னை இணையவழி குற்றப்பிரிவு காவலர்களிடம் இருந்து கிடைத்த தகவலின் அடிப்படையில் ராமநாதபுரம் கேணிக்கரை காவலர்கள் தீவிர விசாரணையில் இறங்கினர்.ராமநாதபுரம் அருகே வாணி கிராமத்தில் உள்ள ஒரு வங்கி கணக்கில் இணையவழி மோசடி மூலம் பெறப்பட்ட சட்டவிரோத பணம் தொடர்ந்து வரவு வைக்கப்பட்டு வந்ததாக காவலர்களுக்கு தகவல் கிடைத்தது.

மேலும், அந்த பணம் பின்னர் கிரிப்டோ நாணயமாக மாற்றப்பட்டு மோசடி கும்பலைச் சேர்ந்தவர்களுக்கு அனுப்பப்பட்டு வருவதாகவும் தெரியவந்தது.இதையடுத்து சம்பந்தப்பட்ட வங்கி கணக்கின் உரிமையாளர் குறித்து கேணிக்கரை காவலர்கள் விசாரணை மேற்கொண்டனர். இதில், அந்த கணக்கு சாத்தான்குளம் பகுதியைச் சேர்ந்த தனசேகரன், 25, என்பவருடையது என்பது தெரியவந்தது.

தொடர்ந்து நடைபெற்ற விசாரணையில், தனசேகரன் தனது வங்கி கணக்கை இணையவழி மோசடி கும்பலினர் பயன்படுத்த அனுமதித்ததும், அந்த கணக்கில் பெறப்பட்ட மோசடி பணத்தை கிரிப்டோ நாணயமாக மாற்றி அவர்களுக்கு அனுப்பியதும் தெரியவந்ததாக காவலர்கள் தெரிவித்துள்ளனர்.

இதற்காக அவர் தொடர்ந்து கமிஷன் தொகை பெற்று வந்ததாகவும், கணிசமான தொகையை கமிஷனாக பெற்றதன் மூலம் ஆடம்பர வாழ்க்கை வாழ்ந்து வந்ததாகவும் விசாரணையில் தெரியவந்துள்ளது.இதையடுத்து தனசேகரனை கேணிக்கரை காவலர்கள் கைது செய்தனர்.

அவரிடம் நடத்தப்பட்ட விசாரணையில், மோசடி கும்பலின் பணப்பரிமாற்றத்துக்காக தனது வங்கி கணக்கை பயன்படுத்த அனுமதித்து பணம் பெற்றதையும், மோசடி மூலம் கிடைத்த பணத்தை கிரிப்டோ நாணயமாக மாற்றி சம்பந்தப்பட்ட நபர்களுக்கு அனுப்பி வந்ததையும் ஒப்புக்கொண்டதாக காவலர்கள் தெரிவித்துள்ளனர்.

கைது செய்யப்பட்ட தனசேகரன் நீதிமன்றத்தில் முன்னிலைப்படுத்தப்பட்டார். அவரை வருகிற 19-ந்தேதி வரை சிறையில் அடைக்க நீதிபதி உத்தரவிட்டதைத் தொடர்ந்து, அவர் சிறையில் அடைக்கப்பட்டார்.