தமிழகத்தில் தமிழக வெற்றிக் கழகம் (தவெக) ஆட்சி அமைப்பதற்கான முயற்சிகள், ஒரு விறுவிறுப்பான அரசியல் த்ரில்லராக மாறியுள்ளன. 108 இடங்களில் வென்றுள்ள தவெக-விற்கு, காங்கிரஸ் மற்றும் இடதுசாரி கட்சிகள் ஏற்கனவே பச்சைக்கொடி காட்டியுள்ள நிலையில், விடுதலை சிறுத்தைகள் கட்சியின் (VCK) 2 இடங்களும் கிடைத்தால் விஜய்யின் பலம் 119-ஆக உயரும். இது ஆட்சி அமைக்கத் தேவையான 118-ஐ விட அதிகம் என்றாலும், கோட்டைக்குச் செல்லும் வழி அவ்வளவு எளிதாகத் தெரியவில்லை.

விடுதலை சிறுத்தைகள் கட்சி ஆதரவு அளித்தாலும், ஆளுநர் ஆர்.வி. அர்லேகர் தவெக-வை ஆட்சி அமைக்க உடனடியாக அழைப்பாரா என்பது தற்போதைய சூழலில் பெரும் கேள்விக்குறியாக உள்ளது.

இதற்கு முக்கியக் காரணம், அமமுக எம்.எல்.ஏ காமராஜ் தொடர்பான ‘கடித சர்ச்சை’. காமராஜின் ஆதரவு கடிதம் போலியானது என்றும், தவெக குதிரை பேரத்தில் ஈடுபடுவதாகவும் டிடிவி தினகரன் முன்வைத்துள்ள புகார், ஆளுநருக்கு ஒரு ‘பிடிமானத்தை’ கொடுத்துள்ளது. ஆளுநர் மாளிகை வட்டாரங்களின்படி, இந்த புகார் தொடர்பாக முறைப்படி விசாரணைக்கு உத்தரவிட ஆளுநர் பரிசீலித்து வருவதாகத் தெரிகிறது.

காமராஜ் பயன்படுத்தும் போனில் வாட்ஸ்அப் வசதியே இல்லை என்று கூறப்படும் நிலையில், வாட்ஸ்அப் மூலம் கடிதம் வந்ததாகக் கூறப்படும் தவெக-வின் வாதம் சட்டரீதியாகச் சிக்கலை ஏற்படுத்தியுள்ளது. ஒருவேளை ஆளுநர் இந்த விவகாரத்தில் விசாரணைக்கு உத்தரவிட்டால், பதவியேற்பு விழா மேலும் தள்ளிப்போகக்கூடும்.

இது ஒருபுறமிருக்க, திமுக மற்றும் அதிமுக ஆகிய இரு துருவங்களும் இந்தச் சூழலைத் தங்களுக்குச் சாதகமாகப் பயன்படுத்தக் காத்திருக்கின்றன.

பதவியேற்பு விழாவுக்கான சுப நேரத்தை விஜய் தரப்பு எதிர்நோக்கிக் காத்திருந்தாலும், ஆளுநரின் ‘நடைமுறை மற்றும் சட்ட’ ரீதியான கேள்விகள் விஜய்யின் அரசியல் பயணத்திற்கு முதல் சோதனையாக அமைந்துள்ளன. இந்த அரசியல் சதுரங்கத்தில் அடுத்த நகர்வு என்னவாக இருக்கும் என்பதைத் தமிழகம் ஆவலுடன் கவனித்து வருகிறது.