நீலகிரி மாவட்டம் குன்னூர் அருகிலுள்ள அட்டடி கிராமத்தில், இரவு நேரத்தில் சிறுத்தை ஒன்று மக்கள் வசிக்கும் பகுதிக்குள் நுழைந்த சம்பவம் பரபரப்பை ஏற்படுத்தியுள்ளது.

இந்த காட்சிகள் அடங்கிய காணொலி சமூக வலைதளங்களில் வேகமாக பரவி வருவதால், அப்பகுதி மக்கள் மத்தியில் அச்ச உணர்வு அதிகரித்துள்ளது.நேற்று இரவு உணவு தேடி அட்டடி கிராமத்திற்குள் வந்த சிறுத்தை, குடியிருப்புகள் அமைந்துள்ள பகுதியில் நீண்ட நேரம் உலா வந்ததாக தெரிவிக்கப்படுகின்றது.

அப்போது அங்கிருந்த நாய் ஒன்றை வேட்டையாட முயன்றதாகவும், ஆனால் அதன் முயற்சி வெற்றியளிக்காததால் சிறுத்தை அங்கிருந்து வனப்பகுதியை நோக்கி திரும்பிச் சென்றதாகவும் காணொலியில் பதிவாகியுள்ளது.சிறுத்தை நடமாட்டம் தொடர்பான காட்சிகள் வெளியானதும், அட்டடி மற்றும் சுற்றுவட்டார கிராம மக்களிடையே பரபரப்பு ஏற்பட்டுள்ளது.

குறிப்பாக இரவு நேரங்களில் குழந்தைகள், முதியவர்கள் மற்றும் கால்நடைகளின் பாதுகாப்பு குறித்து பொதுமக்கள் கவலை தெரிவித்து வருகின்றனர்.

மக்கள் வசிக்கும் பகுதிகளுக்குள் அடிக்கடி காட்டு விலங்குகள் நுழைவதை தடுக்க வனத்துறை அதிகாரிகள் விரைவான மற்றும் நிரந்தர தீர்வுகளை மேற்கொள்ள வேண்டும் என கிராம மக்கள் வலியுறுத்தியுள்ளனர்.

மேலும், சிறுத்தையின் நடமாட்டத்தை தொடர்ந்து கண்காணித்து, மக்கள் பாதுகாப்பை உறுதிப்படுத்தும் வகையில் கூடுதல் கண்காணிப்பு நடவடிக்கைகள் மேற்கொள்ளப்பட வேண்டும் என்றும், இரவு நேரங்களில் பாதுகாப்பு ஏற்பாடுகளை பலப்படுத்த வேண்டும் என்றும் அப்பகுதி மக்கள் கோரிக்கை விடுத்துள்ளனர்.

காட்டு விலங்குகளின் ஊரக நுழைவு அதிகரித்து வருவது வனப்பகுதி மற்றும் மனித குடியிருப்புகளுக்கிடையேயான இடைவெளி குறைந்து வருவதை வெளிப்படுத்துவதாகவும் தெரிவிக்கப்படுகின்றது.