தேசிய முற்போக்கு திராவிட கழகத்தின் (தேமுதிக) நிறுவனத் தலைவர், மறைந்த கேப்டன் விஜயகாந்த் பிறந்தநாளை முன்னிட்டு, அண்ணா திராவிட முன்னேற்றக் கழகத்தின் (அதிமுக) பொதுச் செயலாளர் எடப்பாடி கே. பழனிசாமி சமூக வலைதளத்தில் உருக்கமான பதிவை வெளியிட்டுள்ளார்.

அவரது பதிவில்,“தன்னுடைய உணர்ச்சி மிகு நடிப்பால் வெகுஜன மக்களின் மனதை கவர்ந்த திரை ஆளுமை,எளிய மக்கள் மீது உண்மையான அக்கறையுடன் செயல்பட்ட பண்பாளர்,கடின உழைப்பால் பொதுவாழ்விலும் சட்டமன்ற எதிர்க்கட்சித் தலைவராக உயர்ந்த தேமுதிக நிறுவனத் தலைவர், மறைந்த அன்புச் சகோதரர் கேப்டன் விஜயகாந்த் அவர்களின் பிறந்தநாளில்,அவரின் உள்நோக்கமற்ற ஈகை குணத்தையும் மக்கள் மனதில் என்றும் நீங்காத அன்பையும் நினைவுகூர்கிறேன்” என எடப்பாடி பழனிசாமி பதிவு செய்துள்ளார்.

தமிழ்த் திரையுலகில் தனித்துவமான நடிப்பு மற்றும் கதாபாத்திரங்களால் ரசிகர்களின் மனதில் இடம்பிடித்தவர் விஜயகாந்த். ‘கேப்டன்’ என்ற பட்டத்தை ரசிகர்கள் வழங்கிய அளவிற்கு, திரை உலகில் அவர் உருவாக்கிய தனித்துவம் மிகப் பெரிது.

திரைப்பட வாழ்க்கையைத் தொடர்ந்து, அவர் தேமுதிக என்ற அரசியல் கட்சியை நிறுவி, குறுகிய காலத்திலேயே தமிழ்நாட்டு அரசியலில் முக்கிய இடத்தைப் பிடித்தார். 2011-ம் ஆண்டு எதிர்க்கட்சித் தலைவராகப் பதவி வகித்தது அவரது அரசியல் வாழ்வின் உச்சம்.

விஜயகாந்தின் நேர்மை, மக்கள் பாசம், எளிமை ஆகிய பண்புகள் அவரை அரசியலிலும் மக்கள் நலனிலும் தனித்துவமான பாத்திரமாக உருவாக்கின.அவரது மறைவு இன்று வரை ரசிகர்களுக்கும் அரசியல் தொண்டர்களுக்கும் மறக்க முடியாத வெற்றிடமாகவே உள்ளது.

இவ்வாறு கேப்டன் விஜயகாந்த் பிறந்தநாளை முன்னிட்டு எடப்பாடி பழனிசாமி வெளியிட்ட உருக்கமான பதிவு, அவரது அரசியல் - திரை மரியாதையை மீண்டும் வலியுறுத்தியதாக பார்க்கப்படுகிறது.