வீரபாண்டிய கட்டபொம்மன், தமிழகத்தில் ஆங்கிலேயர் ஆட்சியை எதிர்த்துப் போரிட்ட 18ஆம் நூற்றாண்டைச் சேர்ந்த பாளையக்கார மன்னர் ஆவார். ஜனவரி 3 1760 அன்று ஆறுமுகத்தம்மாள்- திக்குவிசய கட்டபொம்மு தம்பதியருக்கு, பாஞ்சாலங்குறிச்சியில் பிறந்தவர் வீரபாண்டிய கட்டபொம்மன். 

இவரது துணைவியார் வீரசக்கம்மாள். இவர்களுக்கு குழந்தை பேறு இல்லை. வீரபாண்டிய கட்டபொம்மனுக்கு ஊமைத்துரை, துரைச்சிங்கம் என்ற இரு சகோதரர்களும், ஈசுவர வடிவு, துரைக்கண்ணு என்ற இரு சகோதரிகளும் இருந்தனர்.

1797- 1798-ல் நடந்த முதல் போரில் வீரபாண்டிய கட்டபொம்மனிடம் ஆலன் துரை தோல்வியடைந்தார். அதன் பின்னர் திருநெல்வேலி ஆட்சியர் ஜாக்சன், கட்டபொம்மனை கைது செய்ய முயன்றார். 

அவரின் தந்திரத்தை முறியடித்து வீரபாண்டியக் கட்டபொம்மன் பாஞ்சாலங்குறிச்சி வந்தடைந்தார். செப்டம்பர் 5, 1799-ல் ஆங்கிலேயத் தளபதியால் பாஞ்சாலங்குறிச்சி கோட்டை முற்றுகையிடப்பட்டது. அங்கு நடந்த போரில் பல ஆங்கிலேயர்கள் உயிரிழந்தனர். இருப்பினும் கோட்டை வீழ்ந்துவிடும் என்ற நிலையில் வீரபாண்டிய கட்டபொம்மன் கோட்டையை விட்டு வெளியேறினார். 

அக்டோபர் 1, 1799-ல் புதுக்கோட்டை சமஸ்தானத்தின் மன்னர் விஜயரகுநாத தொண்டமானால் கட்டபொம்மன் கைது செய்யப்பட்டு  ஒப்படைக்கப்பட்டார். அக்டோபர் 16 1799-ல் கயத்தாறு எனுமிடத்தில் கட்டபொம்மன் தூக்கிலிடப்பட்டார்.

கட்டபொம்மன் இறந்தபிறகு, ஆங்கிலேயர்களால் பாளையங்கோட்டை சிறையில் அடைக்கப்பட்டிருந்த கட்டபொம்மனின் சகோதரர் ஊமைத்துரை, பாஞ்சாலக் குறிச்சி வீரர்களால் மீட்கப்பட்டார். அதன்பிறகு பாஞ்சாலக் குறிச்சிக்கோட்டைக்குப் புத்துயிர் கிடைத்தது. 

அதன்பிறகு ஆங்கிலேயர்கள் 24.05.1801-ல் கோட்டையை கைப்பற்றினர். அதன்பிறகு ஊமைத்துரையும் அவர் தம்பி துரைசிங்கமும் கைது செய்யப்பட்டு பாஞ்சாலக் குறிச்சி பீரங்கி மேட்டில் தூக்கிலிடப்பட்டனர். 

தேச விடுதலைக்காக தன்னுயிரையே விலை கொடுத்து, குடும்பத்தையும் பலிதானம் தந்த மாவீரன் வீரபாண்டிய கட்டபொம்மன் அவர்களின் தியாகத்தை போற்றுவோம்.