சேலம் மாவட்டத்தில் உள்ள பொன்னம்மாபேட்டை மிலிட்டரி சாலை காளியம்மன் கோவில் தெருவை சேர்ந்தவர்கள் மனோகரன்-ராணி தம்பதியினர். இவர்களுக்கு 3 மகள்களும், 2 மகன்களும் இருந்தனர். இதில் இரண்டாவது மகன் சரவணனின் நடவடிக்கையில் கடந்த ஓராண்டாக மாற்றம் ஏற்பட்டது.

இதையடுத்து அவர் கடந்த மே மாதம் அறுவை சிகிச்சை செய்து கொண்டு திருநங்கையாக மாறி தன்னுடைய பெயரை வனிதா என்று மாற்றி கொண்டார். இதனால் அவர் வீட்டை விட்டு வெளியேறி வடக்கு ரெயில்வே லைன் பகுதியில் வாடகைக்கு வீடு எடுத்து தனியாக வசித்து வந்தார்.

இந்த நிலையில், நேற்று காலை வனிதாவின் வீட்டுக்கு அவரது அக்கா மரகதம் சென்றார். அப்போது வீட்டின் கதவில் ஒரு குச்சியை சொருகி அடைத்து வைக்கப்பட்டிருந்தது. ஆனால் வனிதாவின் செருப்பு வெளியே கிடந்துள்ளது. இதை பார்த்த மரகதம், அந்த குச்சியை எடுத்துவிட்டு வீட்டுக்குள் சென்றபோது வனிதாவின் முகம் துணியால் மூடப்பட்டு இருந்தது. அந்தது துணியை எடுத்து பார்த்த போது தலையில் ரத்தக்காயங்களுடன் வாய்க்குள் துப்பட்டா அமுக்கி வைக்கப்பட்டிருந்த நிலையில் வனிதா கிடந்ததை கண்டு அதிர்ச்சியடைந்தார்.

பின்னர் தனது பெற்றோருக்குத் தகவல் தெரிவித்தார். அதன் படி அவர்கள் சம்பவ இடத்திற்கு விரைந்து வந்து கதறி அழுதனர். இதற்கிடையே இந்த சம்பவம் குறித்து தகவல் அறிந்த போலீசார் விரைந்து சென்று வனிதாவின் உடலை மீட்டு பிரேத பரிசோதனைக்காக மருத்துவமனைக்கு அனுப்பி வைத்தனர். பின்னர் அந்த வீட்டில் இருந்து போலீசார் இரும்பு ராடு ஒன்றை கைப்பற்றினர். இதன் மூலம் திருநங்கை வனிதா இரும்பு ராடால் அடித்துக்கொலை செய்யப்பட்டது தெரியவந்தது.

பின்னர் போலீசார் இந்த கொலை தொடர்பாக தீவிர விசாரணை நடத்தினர். முதற்கட்ட விசாரணையில், “திருநங்கையான வனிதாவுக்கும், நாமக்கல் மாவட்டம் திருச்செங்கோடு பகுதியை சேர்ந்த நவீன் என்ற வாலிபருக்கும் இடையே பழக்கம் ஏற்பட்டதையடுத்து இருவரும் ஒன்றாக பல்வேறு இடங்களில் சுற்றி வந்துள்ளனர். 

நேற்று முன்தினம் இரவு வனிதாவும், நவீனும் வீட்டுக்கு வந்து மது அருந்தியுள்ளனர். அப்போது அவர்களிடையே தகராறு ஏற்பட்டுள்ளது. இதில் ஆத்திரமடைந்த நவீன் இரும்பு ராடால் வனிதாவின் தலையில் அடித்துக்கொலை செய்தது தெரிய வந்துள்ளது.

பணம் கொடுக்கல், வாங்கல் தகராறில் வனிதா கொலை செய்யப்பட்டாரா? அல்லது வேறு காரணம் ஏதும் உள்ளதா? என்று தொடர்ந்து விசாரித்து வருகிறோம். வாலிபர் நவீனை வலைவீசி தேடி வருகிறோம். அவரை பிடித்து விசாரணை நடத்தினால் தான் கொலைக்கான முழு காரணம் தெரியவரும்” என்று போலீசார் தெரிவித்தனர்.