திருச்சி அரசு மருத்துவமனையில் பிரசவத்தின்போது ரத்தம் செலுத்தப்பட்டதால் எச்.ஐ.வி. தொற்றால் பாதிக்கப்பட்ட பெண்ணுக்கும், அவரது குழந்தைக்கும் மொத்தம் ரூ.40 லட்சம் இழப்பீடு வழங்க தமிழக அரசுக்கு சென்னை உயர்நீதிமன்ற மதுரை அமர்வு உத்தரவிட்டுள்ளது. பாதிக்கப்பட்ட தாய் மற்றும் குழந்தையின் எதிர்கால நலனைக் கருத்தில் கொண்டு, இருவருக்கும் தலா ரூ.20 லட்சம் வழங்க வேண்டும் என நீதிபதி சி. சரவணன் அமர்வு உத்தரவிட்டுள்ளது.

திருச்சி மகாத்மா காந்தி நினைவு அரசு பொது மருத்துவமனையில் கடந்த 2022-ம் ஆண்டு அக்டோபர் மாதம், பிரசவத்திற்காக ஒரு பெண் அனுமதிக்கப்பட்டார். பிரசவத்தின்போது ஏற்பட்ட சிக்கல் காரணமாக அவருக்கு ரத்தம் செலுத்த வேண்டிய அவசியம் ஏற்பட்டது. இதையடுத்து, மருத்துவமனையின் ரத்த வங்கியில் இருந்து பெறப்பட்ட ரத்தம் அவருக்குச் செலுத்தப்பட்டது.ஆனால், இந்தச் சிகிச்சைக்குப் பிறகு அந்தப் பெண்ணுக்கும், அவருக்குப் பிறந்த குழந்தைக்கும் எச்.ஐ.வி. தொற்று இருப்பது தெரியவந்தது.

இதனால் அதிர்ச்சியடைந்த பெண், தனக்கும் தனது குழந்தைக்கும் ஏற்பட்ட பாதிப்புக்கு இழப்பீடு வழங்குவதுடன், உரிய மருத்துவ உதவிகளையும் உறுதிசெய்ய வேண்டும் என்று கோரி சென்னை உயர்நீதிமன்ற மதுரை அமர்வில் மனுத் தாக்கல் செய்தார்.வழக்கு விசாரணையின்போது, மருத்துவமனை நிர்வாகத்தின் தரப்பில் விளக்கம் அளிக்கப்பட்டது. ரத்த தானம் வழங்கியவரிடம் இருந்து ரத்தம் பெறப்பட்டபோது, எச்.ஐ.வி. தொற்றுக்கான பரிசோதனை மேற்கொள்ளப்பட்டதாகத் தெரிவிக்கப்பட்டது.

ஆனால், ரத்த தானம் செய்தவர் தொற்றின் ஆரம்பக் கட்டத்தில், அதாவது சாளரக் காலத்தில் இருந்ததால், அப்போது நடத்தப்பட்ட பரிசோதனையில் தொற்று கண்டறியப்படவில்லை என்று மருத்துவமனை தரப்பில் விளக்கமளிக்கப்பட்டது. இதன் காரணமாக, தொற்று இருப்பது தெரியாமலேயே அந்த ரத்தம் பெண்ணுக்குச் செலுத்தப்பட்டதாகவும் தெரிவிக்கப்பட்டது.

இந்த வழக்கை கடந்த 14-ந்தேதி விசாரித்த நீதிபதி சி. சரவணன் அமர்வு, பாதிக்கப்பட்ட பெண்ணுக்கும் அவரது குழந்தைக்கும் இழப்பீடு வழங்குவது தொடர்பாக தமிழக அரசு தெரிவித்த ஒப்புதலைப் பதிவு செய்தது.இதன்படி, தாய்க்கு ரூ.20 லட்சமும், குழந்தைக்கு ரூ.20 லட்சமும் என மொத்தம் ரூ.40 லட்சம் இழப்பீடு வழங்க தமிழக அரசுக்கு நீதிமன்றம் உத்தரவிட்டது.

இதையடுத்து, வழக்கு முடித்து வைக்கப்பட்டது.மேலும், குழந்தைக்கு வழங்கப்படும் ரூ.20 லட்சம் தொகையை தேசியமயமாக்கப்பட்ட வங்கியிலோ அல்லது அஞ்சலகத்திலோ நிலையான வைப்புத் தொகையாக முதலீடு செய்ய வேண்டும் என்றும் நீதிமன்றம் உத்தரவிட்டது. குழந்தைக்கு 18 வயது நிறைவடையும் வரை அந்தத் தொகை பாதுகாக்கப்பட வேண்டும் என்றும், அதிலிருந்து கிடைக்கும் வட்டியை குழந்தையின் மருத்துவச் செலவுகள் மற்றும் வாழ்வாதாரத் தேவைகளுக்குப் பயன்படுத்த வேண்டும் என்றும் நீதிமன்றம் அறிவுறுத்தியுள்ளது.

பிரசவச் சிகிச்சையின்போது ஏற்பட்ட பாதிப்பால் தாயும் குழந்தையும் நீண்டகால மருத்துவத் தேவைகளை எதிர்கொள்ள வேண்டிய நிலையில், அவர்களுக்கு இழப்பீடு வழங்குவதற்கான இந்த உத்தரவு முக்கியத்துவம் பெற்றுள்ளது.