கோவையில் திரண்டிருந்த பெருங்கூட்டத்திற்கு நடுவே, மூன்று தசாப்தங்களாகத் தன்னுடன் பயணித்து வரும் பழைய ரசிகரைத் தமிழக முதல்வர் சி. ஜோசப் விஜய் சட்டென்று அடையாளம் கண்டுகொண்ட சம்பவம் நெகிழ்ச்சியை ஏற்படுத்தியுள்ளது. முதல்வராக உயர்ந்த பின்னரும் பழைய பாசத்தையும் உறவையும் மறக்காமல், தொண்டரை அழைத்து நலம் விசாரித்த விஜய்யின் செயல் அரசியல் வட்டாரத்திலும் சமூக வலைதளங்களிலும் பேசுபொருளாகியுள்ளது.ரூ.300 கோடி செலவில் உருவாக்கப்பட்டுள்ள பெரியார் அறிவுலகத்தைத் திறந்து வைப்பதற்காகத் தமிழக முதல்வர் விஜய் இன்று கோவைக்கு வருகை தந்தார்.

கோவை சர்வதேச விமான நிலையத்திற்கு வெளியே தமிழக வெற்றிக் கழகத் தொண்டர்களும் பொதுமக்களும் திரண்டு அவருக்கு உற்சாக வரவேற்பு அளித்தனர்.விமான நிலையத்திலிருந்து வெளியே வந்த முதல்வர், சாலையோரங்களில் திரண்டிருந்த மக்களைப் பார்த்தபடி காரில் மெதுவாகச் சென்றார். அப்போது, அவரைக் காண்பதற்காக ஏராளமானோர் கூடியிருந்த நிலையில், கூட்டத்தில் நின்றிருந்த பழைய ரசிகர் ஒருவரை விஜய் அடையாளம் கண்டுகொண்டார்.

மேட்டுப்பாளையத்தைச் சேர்ந்த மூத்த ரசிகர் மன்ற நிர்வாகி ரங்கராஜ், விமான நிலையப் பிரதான சாலையில் திரண்டிருந்த மக்களுடன் நின்றுகொண்டிருந்தார். அவரைக் கண்டதும் முதல்வர் விஜய் உடனடியாகக் காரை நிறுத்தச் சொல்லி, பாதுகாப்புப் பணியாளர்கள் மூலம் ரங்கராஜைத் தன்னருகே அழைத்தார்.பின்னர் காரின் அருகே வந்த ரங்கராஜின் தோளில் அன்புடன் கைபோட்ட விஜய், அவரது குடும்பத்தினரைப் பற்றியும் நலம் விசாரித்தார்.

“எப்படி இருக்கீங்க? குடும்பத்தினர் அனைவரும் நலம்தானா?” என்று இயல்பாகப் பேசியதாகத் தெரிவிக்கப்படுகிறது.முதல்வர் பதவியில் இருந்தபோதும், பல ஆண்டுகளுக்கு முன்பு இருந்த அதே அன்புடன் தன்னை அழைத்து நலம் விசாரித்ததைப் பார்த்து ரங்கராஜ் நெகிழ்ந்தார். அருகில் இருந்த தொண்டர்களும் இந்தச் சந்திப்பைக் கண்டு மகிழ்ச்சியடைந்தனர்.முதல்வர் விஜய்யின் எதிர்பாராத அன்பால் நெகிழ்ந்த ரங்கராஜ், பின்னர் செய்தியாளர்களிடம் தனது மகிழ்ச்சியைப் பகிர்ந்துகொண்டார்.

30 ஆண்டுகளாக நான் விஜய் ரசிகராக இருக்கிறேன். ‘ஒன்ஸ் மோர்’ திரைப்படம் வந்த காலத்திலிருந்தே அவருடன் பயணித்து வருகிறேன். இன்று அவர் தமிழக முதல்வராக உயர்ந்திருக்கிறார். இவ்வளவு பெரிய கூட்டத்தில் இருந்தபோதும் என்னை அடையாளம் கண்டு அழைத்து நலம் விசாரித்தது மிகவும் மகிழ்ச்சியாக இருக்கிறது.

இத்தனை ஆண்டுகளுக்குப் பிறகும் என்னை மறக்காமல் நினைவில் வைத்திருப்பது நெகிழ்ச்சியாக உள்ளது” என்று தெரிவித்தார்.திரையுலகப் பயணத்திலிருந்து அரசியலுக்கு வந்து தமிழக முதல்வராகப் பொறுப்பேற்றுள்ள விஜய், தனது ஆரம்பகால ரசிகர்களுடனான நெருக்கத்தைத் தொடர்ந்து வெளிப்படுத்தியிருப்பதாக இந்தச் சம்பவத்தைப் பலரும் பகிர்ந்து வருகின்றனர்.

கோவையில் ரசிகர் ரங்கராஜை முதல்வர் விஜய் அடையாளம் கண்டு நலம் விசாரிக்கும் காட்சிகள் சமூக வலைதளங்களில் வேகமாகப் பரவி வருகின்றன. பதவியும் புகழும் உயர்ந்தாலும், நீண்டகாலமாகத் தன்னுடன் இருந்தவர்களை நினைவில் வைத்திருப்பது முக்கியம் என்பதை இந்தச் சந்திப்பு வெளிப்படுத்துவதாக அவரது ஆதரவாளர்கள் கருத்துத் தெரிவித்து வருகின்றனர்.