கூகுள் வரைபடத்தின் வழிகாட்டுதலைப் பின்பற்றி சென்ற கார், இருசக்கர வாகனம் மட்டுமே செல்லக்கூடிய குறுகிய தெருவுக்குள் சிக்கிக்கொண்ட சம்பவம் கன்னியாகுமரி மாவட்டத்தில் பரபரப்பை ஏற்படுத்தியது. வீடுகளின் சுற்றுச்சுவர்களுக்கு இடையே முன்னும் பின்னும் நகர முடியாமல் தவித்த காரையும், அதற்குள் சிக்கியிருந்த நான்கு வாலிபர்களையும் அப்பகுதி மக்கள் போராடி பத்திரமாக மீட்டனர்.கேரள மாநிலம் அடூரில் இருந்து கன்னியாகுமரி மாவட்டம் குலசேகரம் நோக்கி நான்கு வாலிபர்கள் நேற்று முன்தினம் காரில் புறப்பட்டனர். வழித்தடத்தை அறிந்துகொள்வதற்காக அவர்கள் கூகுள் வரைபடத்தின் வழிகாட்டுதலைப் பயன்படுத்தியுள்ளனர்.

காரில் இருந்த வாலிபர்கள் மதுபோதையில் இருந்ததாகவும் தெரிவிக்கப்படுகிறது.இந்நிலையில், மேல்புறம் அருகே உள்ள செம்மங்காலி பகுதிக்கு வந்தபோது, அவர்கள் காரை மிகவும் குறுகலான தெருவுக்குள் செலுத்தியுள்ளனர். இருசக்கர வாகனம் மட்டுமே செல்லும் அளவுக்கு இருந்த அந்தத் தெருவில் கார் சிறிது தூரம் சென்றதும், இருபுறங்களிலும் இருந்த வீடுகளின் சுற்றுச்சுவர்களில் உரசியது.தொடர்ந்து முன்னோக்கிச் செல்லவும், பின்னோக்கி நகர்த்தவும் முடியாமல் கார் நடுவழியில் சிக்கிக்கொண்டது.

குறுகிய இடத்தில் கார் இறுக்கமாக மாட்டிக்கொண்டதால், அதற்குள் இருந்த வாலிபர்களும் கதவுகளைத் திறந்து வெளியேற முடியாமல் தவித்தனர். காரின் இருபுறங்களிலும் சுவர்களில் உரசியதால் வாகனமும் சேதமடைந்தது.காரில் இருந்து எழுந்த சத்தத்தைக் கேட்டு வீடுகளில் இருந்தவர்கள் வெளியே வந்து பார்த்தனர்.

அப்போது, குறுகிய தெருவுக்குள் கார் சிக்கி நகர முடியாமல் நிற்பதைக் கண்டு நிலைமையை உணர்ந்தனர்.உடனடியாக வாலிபர்களுக்கு உதவ முன்வந்த அப்பகுதி மக்கள், காரைச் சரியான முறையில் நகர்த்துவதற்கு முயற்சி செய்தனர். நீண்ட போராட்டத்துக்குப் பிறகு, காரை மெதுவாகத் தள்ளி குறுகிய தெருவிலிருந்து வெளியே கொண்டுவந்தனர்.

இதனால் காருக்குள் சிக்கித் தவித்த நான்கு வாலிபர்களும் நிம்மதியடைந்தனர்.இதற்கிடையே, தகவலறிந்து குழித்துறை தீயணைப்புத் துறையினரும் சம்பவ இடத்துக்கு வந்தனர். அவர்கள் வாலிபர்களிடம் விசாரித்தபோது, கேரள மாநிலம் அடூரில் இருந்து குலசேகரம் செல்வதற்காகக் கூகுள் வரைபடத்தின் வழிகாட்டுதலைப் பின்பற்றி வந்தபோது குறுகிய தெருவுக்குள் சிக்கிக்கொண்டதாகத் தெரிவித்தனர்.

பின்னர், வாலிபர்களுக்கு உரிய அறிவுரைகளை வழங்கிய தீயணைப்புத் துறையினர், அவர்களைப் பாதுகாப்பாக அனுப்பி வைத்தனர். வழித்தடத்தைத் தேர்வு செய்யும்போது சாலையின் அகலத்தையும் வாகனம் செல்ல ஏற்றதா என்பதையும் கவனிக்க வேண்டியதன் அவசியத்தை இந்தச் சம்பவம் உணர்த்தியுள்ளது.