குழந்தைகள் தினமான நவம்பர் 14 அன்று தமிழகத்தில் உள்ள அரசுப் பள்ளி மாணவர்களுக்குப் பிரம்மாண்டமான முறையில் இனிப்பு விருந்து வழங்கத் தமிழ்நாடு அரசு தயாராகி வருகிறது. தமிழ்நாடு நுகர்பொருள் வாணிபக் கழகம் (TNCSC) வெளியிட்டுள்ள டெண்டர் ஆவணங்களின்படி, சுமார் 61.84 லட்சம் மாணவர்களுக்கு 4 சுவைகளில் 'ஸ்பாஞ்ச் ஸ்லைஸ் கேக்' (Sponge Slice Cake) வழங்கப்படவுள்ளது.

திட்டத்தின் முக்கிய அம்சங்கள் & தரக்கட்டுப்பாடுகள்:
பயனாளிகள் & நிதி ஒதுக்கீடு: சத்துணவு திட்டத்தின் கீழ் கல்வி கற்கும் சுமார் 61.84 லட்சம் அரசுப் பள்ளி மாணவர்களுக்கு இந்த கேக் வழங்கப்பட உள்ளது. இதற்காகத் தமிழக அரசு ரூ. 9.27 கோடி நிதி ஒதுக்கியுள்ளது.

எடை மற்றும் பேக்கிங்: ஒவ்வொரு கேக்கும் தனித்தனி கவரில் பேக் செய்யப்பட்டு சரியாக 45 கிராம் எடைக் கொண்டதாக இருக்க வேண்டும். கவர்களில் பிராண்ட் பெயர், சுவை, எடைக் குறிப்பு, FSSAI உரிம எண், தயாரிப்பு மற்றும் காலாவதி தேதி மற்றும் அரசின் லோகோ கட்டாயம் இடம்பெற்றிருக்க வேண்டும்.

4 வகையான சுவைகள்: மாணவர்களுக்கு ஒரே சுவைக்குப் பதிலாக மாறுபட்ட சுவைகளைக் கொடுக்கும் வகையில்,

Mixed Fruit / Tutti-Frutti
Classic Vanilla
Rich Chocolate
பட்டர்  / மில்க் ஆகிய 4 விதமான சுவைகளில் கேக்குகள் தயாரிக்கப்படும்.

கண்காணிப்பு மற்றும் தரம்: கேக் பஞ்சு போன்ற மென்மையுடன் இருக்க வேண்டும். பூஞ்சை (Fungus) அல்லது கெட்ட வாடை இருக்கக் கூடாது. Trans-fat மற்றும் அரசு தடை செய்த செயற்கை வண்ணங்கள் சேர்ப்பது முற்றிலும் தடை செய்யப்பட்டுள்ளது. டெண்டரில் பங்கேற்கும் நிறுவனங்கள் அனைத்துச் சுவைகளிலும் சாம்பிள் கேக்குகளைச் சமர்ப்பித்துத் தரச்சான்றிதழ் பெற வேண்டும்.

30 நாள் கெடாத ஆயுட்காலம் (Shelf Life Mandate): நவம்பர் 14 அன்று அந்தந்த TNCSC குடோன்களுக்கு கேக்குகள் வந்துசேரும்போதே, அவற்றின் காலாவதி தேதி இன்னும் குறைந்தபட்சம் 30 நாட்களுக்கு மேல் மீதமிருக்கும் வகையில் (Extended Shelf Life) தயாரிக்கப்பட்டிருக்க வேண்டும் என்று அரசு மிகவும் கறாரான நிபந்தனையை விதித்துள்ளது.