வரவிருக்கும் 2026 தமிழ்நாடு சட்டமன்றத் தேர்தலை முன்னிட்டு, அதிமுகவின் அரசியல் வியூகம் குறித்து முடிவு எடுக்க பொதுச்செயலாளர் எடப்பாடி பழனிசாமி கடுமையான அழுத்தத்தில் இருப்பதாக கட்சி வட்டாரங்கள் தெரிவிக்கின்றன. குறிப்பாக, நடிகர் விஜயின் தமிழக வெற்றிக் கழகத்தை (TVK) கூட்டணியில் சேர்க்க வேண்டும் என்ற அழுத்தம் எடப்பாடியின் தலைவலியை அதிகரித்துள்ளதாக கூறப்படுகிறது.

கட்சியின் எதிர்காலத்தைப் பற்றி மூத்த தலைவர்களுடன் நடைபெற்ற ஒரு ரகசிய விவாதத்தில், “விஜய் கூட்டணியில் இல்லை என்றால், எதிர்க்கட்சித் அந்தஸ்தைப் பெறுவதில்கூட சிரமம் ஏற்படலாம்,” என்று பழனிசாமி கவலை தெரிவித்துள்ளார் என தகவல் வெளியாகியுள்ளது. ஆனால், விஜயை கூட்டணியில் சேர்த்தால் அதிமுகவின் தொகுதி பங்கு கடுமையாகக் குறையும் என்ற அச்சமும் அவரிடம் நிலவுகிறது.

இதற்கிடையில் ஒரு பெரிய கூட்டணிக்கான முன்மொழிவாக உருவாக்கப்பட்ட “ரெட் நோட்” ஒன்றில் தொகுதி பங்கீடு பின்வரும் போன்று பரிந்துரைக்கப்பட்டுள்ளதாக கூறப்படுகிறது:

அதிமுக – 80 முதல் 90 இடங்கள்

பாஜக – 40 இடங்கள் + துணை முதல்வர்

TVK – 50 இடங்கள் + துணை முதல்வர்

பாமக  – 35 இடங்கள் + ஒரு எம்.பி.

தேமுதிக – 20 இடங்கள் + ஒரு எம்.பி.

தமகா – 6 இடங்கள்

ஐஜேகே – 5 இடங்கள்

பிற சிறிய கட்சிகள் – 10 இடங்கள்

இந்த பங்கீடு அதிமுக தொண்டர்களிடம் கடும் அதிருப்தியை ஏற்படுத்தியுள்ளது. "80–90 இடங்கள் மட்டுமே கட்சிக்கு? அதை எப்படிப் பொறுப்பது?" என்ற கேள்வி உள்பிரிவினரிடையே எழுந்துள்ளது.

மேலும், சட்டமன்றத்தில் தொங்கு நிலை ஏற்பட்டால், பாஜக அதிமுக தலைமையிலான அரசு அமைக்க ஆதரிக்காது என்ற அச்சமும் எடப்பாடிக்கு ஏற்பட்டுள்ளது. இது அவரை இன்னும் பெரும் சங்கடத்தில் தள்ளியுள்ளது. ஆட்சி அமைப்பது சாத்தியமில்லையெனில், குறைந்தது எதிர்க்கட்சித் தலைவர் பதவியை பெற்றுக்கொள்ளவேண்டும் என்ற எண்ணத்தில் பழனிசாமி செயல்படுகிறார் எனவும் கூறப்படுகிறது.

இந்நிலையில், பாஜக மூத்த தலைவர் அமித் ஷா விரைவில் தமிழகம் வருகிறார். அவரின் இந்தப் பயணம் மிக முக்கியமானது. அவர் அதிமுக–பாஜக கூட்டணி நிலையை முழுமையாக மதிப்பீடு செய்து, பங்கீட்டில் இறுதி முடிவை எடுப்பார் என எதிர்பார்க்கப்படுகிறது. அதிமுக உட்கட்சி மோதல்கள், எடப்பாடிக்கு உள்ள வருத்தங்கள், தொகுதி ஒதுக்கீட்டில் ஏற்படும் சிக்கல்கள் போன்றவை குறித்து விரிவான பேச்சுவார்த்தை நடைபெற வாய்ப்புள்ளது.

அதே நேரத்தில், அமித் ஷா நடிகர் விஜய் அல்லது அவரது பிரதிநிதிகளை சந்திக்க உள்ளார் என்ற தகவலும் வெளியாகியுள்ளது. விஜயின் நெருங்கிய சட்ட ஆலோசகரை முதலில் அழைத்து பேச்சுவார்த்தை நடத்தலாம் என்றும், அதன் முன்னேற்றத்தைப் பொறுத்து விஜய் நேரடியாக அமித் ஷாவைச் சந்திக்கலாம் என்றும் தகவல்கள் வெளியாகின்றன.

இதற்கிடையில், பாஜக தற்போதுள்ள அதிமுக சட்டமன்ற உறுப்பினர்களின் சில தொகுதிகளையே கோரியுள்ளதாகவும் கூறப்படுகிறது. இதனால் முன்னாள் அமைச்சர்கள் பலரும் தங்கள் தொகுதிகளை காக்க TVK கூட்டணி மிகவும் முக்கியமானதாகப் பார்க்கின்றனர். ஆனால் விஜய் கூட்டணிக்கு வராவிட்டால், சில தலைவர்கள் தேர்தலில் போட்டியிடாமல் விலகலாம் என்ற வதந்தியும் பரவி வருகிறது.

இந்த சூழலில், ஜனவரி மாதத்திற்கு பின் அதிமுகவில் பெரிய உட்கட்சி பூசல் வெடிக்கும் வாய்ப்பு உள்ளதாக அரசியல் பார்வையாளர்கள் எச்சரிக்கிறார்கள். விஜய் கூட்டணி முடிவு, பாஜக பேச்சுவார்த்தைகள், அதிமுக உள்நிலை — மூன்றும் சேர்ந்து தமிழக அரசியலில் பெரிய மாற்றத்தை ஏற்படுத்தும் நிலையில் உள்ளது.