பிளஸ் 2 தேர்வில் தோல்வியடைந்ததால் மாணவன் ஒருவன் கல்குவாரி குட்டையில் விழுந்து தற்கொலை செய்துகொண்ட சம்பவம் பெரும் சோகத்தை ஏற்படுத்தியுள்ளது.

காஞ்சிபுரம் மாவட்டம் குன்றத்தூர் அருகே உள்ள நந்தம்பாக்கம் பெரியார் நகரைச் சேர்ந்தவர் இயேசுபாதம். இவரது மகன் எடிசன் (17 வயது). சோமங்கலம் அரசு மேல்நிலை பள்ளியில் 12-ஆம் வகுப்பு படித்து வந்துள்ளார். அண்மையில் நடைபெற்ற 12-ஆம் வகுப்பு தேர்வை எடிசன் எழுதி இருந்த நிலையில், நேற்று இதற்கான தேர்வு முடிவுகள் வெளிவந்தது. இதில் எடிசன் உயிரியல் பாடத்தில் குறைந்த மதிப்பெண் பெற்று தோல்வியடைந்துள்ளார். 

இதனால் எடிசனின் பெற்றோர் கண்டித்துள்ளனர். இதனையடுத்து எடிசன் கடும் மன உளைச்சலில் இருந்து வந்ததாக கூறப்படுகிறது. பின்னர் நேற்று வீட்டில் இருந்த மோட்டார் சைக்கிளை எடுத்துகொண்டு எடிசன் வெளியே சென்றவர், நீண்ட நேரமாகியும் வீடு திரும்பவில்லை. இதனால் அதிர்ச்சி அடைந்த பெற்றோர் அவரை பல இடங்களில் தேடியுள்ளனர்.

இந்த நிலையில் இன்று சோமங்கலம் அருகே உள்ள நடுவீரப்பட்டு கல்குவாரி பகுதியில் மோட்டார் சைக்கிள், செருப்புகள் கிடப்பது அந்த பகுதி மக்களிடையே சந்தேகத்தை ஏற்படுத்தியுள்ளது.  இது குறித்து தகவலறிந்த எடிசனின் பெற்றோர், உறவினர்கள் சோமங்கலம் அருகே உள்ள கல்குவாரி பகுதிக்கு சென்றுள்ளனர். இதுகுறித்து சோமங்கலம் போலீசாருக்கும் தகவல் தெரிவிக்கப்பட்ட நிலையில், போலீசாரும் சம்பவ இடத்திற்கு சென்று விசாரணை நடத்தினயுள்ளனர்.

அத்துடன், இது தொடர்பாக சோமங்கலம் போலீசார் படப்பை தீயணைப்பு துறையினருக்கு தகவல் தெரிவித்ததை அடுத்து அவர்களும் சம்பவ இடத்திற்கு வந்துள்ளனர். பின்னர் சுமார் ஒரு மணி நேரத்திற்கும் மேலாக தேடி எடிசனின் உடலை கல்குவாரியில் உள்ள குட்டையில் இருந்து தீயணைப்பு படையினர் மீட்ட்டுள்ளனர்.

மாணவனின் உடல் பிரேத பரிசோதனைக்காக ஸ்ரீபெரும்புதூர் அரசு மருத்துவமனைக்கு அனுப்பி வைக்கப்படதோடு, தற்கொலை சம்பவம் தொடர்பாக போலீசார் வழக்குப்பதிவு செய்து விசாரணை நடத்தி வருகின்றனர்.