சென்னை :நீண்டகாலமாக நிலுவையில் உள்ள சொத்து பிரிவினை (பாகப்பிரிவினை) வழக்குகளை ஆறு மாதங்களுக்குள் தீர்க்க வேண்டும் என சென்னை உயர்நீதிமன்றம் அதிரடியாக உத்தரவிட்டுள்ளது.

சென்னை, மதுரை மற்றும் மாநிலம் முழுவதும் உள்ள அனைத்து கீழமை நீதிமன்றங்களுக்கும், தலைமை நீதிபதி நேரடியாக சுற்றறிக்கை அனுப்பியுள்ளார். வழக்குகளை விரைவில் முடிக்க தேவையான இடங்களில் சிறப்பு அமர்வுகள் அமைத்து விசாரணையை துரிதப்படுத்த வேண்டும் என்றும் நீதிமன்றங்களுக்கு அறிவுறுத்தப்பட்டுள்ளது.

இந்த உத்தரவு மூலம் பல ஆண்டுகளாக தேங்கியிருந்த பாகப்பிரிவினை வழக்குகளின் தாமதம் குறைய, வழக்காடுவோருக்கு விரைவான நீதி கிடைக்க வாய்ப்பு உருவாகும். ஆயிரக்கணக்கான சொத்து பிரிவினை வழக்குகளை கையாள்வதில் நீதிமன்றங்களுக்கு தெளிவான வழிகாட்டுதலாக இது அமையும் என கூறப்படுகிறது.

பாகப்பிரிவினை என்றால் என்ன?

ஒரு குடும்பத்தில் உள்ள பரம்பரைச் சொத்தை வாரிசுகளுக்கு இடையே சட்டப்படி பிரித்து வழங்கும் நடைமுறையே பாகப்பிரிவினை ஆகும். பெரும்பாலும் தந்தைவழி சொத்துக்கள், மகன்கள், மகள்கள் உள்ளிட்ட அனைவருக்கும் சமமாக பிரிக்கப்பட வேண்டும்.
இந்தப் பிரிவினை ஆவணமாக துணைப் பதிவாளர் அலுவலகத்தில் பதிவு செய்யப்படுதல் கட்டாயம். பதிவு செய்யப்படாத பாகப்பிரிவினை சட்டபூர்வமாக செல்லாது.

வழக்குகளின் காரணம்

சொத்து பிரிக்கும் போது சில வாரிசுகள் தங்களுக்கு குறைவாக வழங்கப்பட்டதாக கருதி நீதிமன்றத்தை நாடுவது வழக்கம். இதன் காரணமாக பல்வேறு நீதிமன்றங்களில் ஏராளமான சொத்து பிரிவினை வழக்குகள் தேங்கி கிடக்கின்றன.

இதனை கருத்தில் கொண்டு, இவ்வாறான வழக்குகளை ஆறு மாதங்களுக்குள் முடிக்க உயர்நீதிமன்றம் கடுமையான உத்தரவை பிறப்பித்துள்ளது.