தூத்துக்குடி மாவட்டத்தின் முறப்பநாடு பகுதியிலுள்ள பாரதியார் தெருவில் வசித்து வந்த சுப்பரமணியன் மகன் சண்முகவேல் (54), குடும்ப சோகங்களைச் சுமந்த அமைதியான மனிதராக அறியப்பட்டவர். இவரது உடன்பிறந்த நான்கு சகோதரர்களும் மனநிலை பாதிப்பு காரணமாக ஒருவருக்கொருவர் அடுத்தடுத்து உயிரிழந்த துயரச் சம்பவங்கள், இந்தக் குடும்பத்தை ஏற்கனவே சோகத்தில் மூழ்கடித்திருந்தன.

இதனால் முதிய பெற்றோரை பராமரிக்க வேண்டும் என்ற பொறுப்புணர்வில், சண்முகவேல் திருமணம் செய்து கொள்ளாமல் அவர்களுடனேயே தங்கி அவர்களை அன்புடன் கவனித்து வந்ததாக தெரிவிக்கப்படுகிறது.

இவ்வாறு தனி மனிதராக குடும்பப் பொறுப்பை ஏந்தி வந்த நிலையில், நேற்று காலை அவரது வீட்டின் சமையலறையில் கயிற்றால் தூக்கிட்டு உயிரிழந்த நிலையில் சண்முகவேல் காணப்பட்ட சம்பவம் அதிர்ச்சியை ஏற்படுத்தியுள்ளது.

இந்த துயர சம்பவம் குறித்து முறப்பநாடு காவலர்கள் வழக்குப்பதிவு செய்து தீவிர விசாரணையில் ஈடுபட்டு வருகின்றனர்.இதனிடையே, தூத்துக்குடி மாவட்டம் ஸ்ரீவைகுண்டம் அருகிலுள்ள கொங்கராயகுறிச்சி சிவன் கோவில் தெருவைச் சேர்ந்த சுடலை மகன் மாடசாமி (35), கடந்த சில காலமாக குடும்பத்திலிருந்து பிரிந்து தனிமையில் வாழ்ந்து வந்ததாக தெரிவிக்கப்படுகிறது.

மது பழக்கத்துக்கு அடிமையான அவர், அடிக்கடி போதையில் இருந்ததாகவும் தெரிவிக்கப்படுகிறது.இந்த நிலையில், நேற்று தனது வீட்டிலேயே மாடசாமி தூக்கிட்டு உயிரிழந்த சம்பவம் அப்பகுதி மக்களை உலுக்கியுள்ளது.

இந்தத் தகவலறிந்த அக்கம் பக்கத்தினர் அளித்த தகவலின் பேரில், முறப்பநாடு காவலர்கள் சம்பவ இடத்திற்கு விரைந்து சென்று உடலை கைப்பற்றி பிரேதப் பரிசோதனைக்காக அரசு மருத்துவமனைக்கு அனுப்பி வைத்தனர். தொடர்ந்து இந்த சம்பவம் குறித்தும் காவலர்கள் தீவிர விசாரணை மேற்கொண்டு வருகின்றனர்.

தற்கொலை எதற்கும் தீர்வல்ல. மன அழுத்தம் ஏற்பட்டாலோ, தற்கொலை எண்ணம் வந்தாலோ, அதில் இருந்து விடுபடுவதற்கு தமிழக சுகாதார சேவை உதவி மையம் - 104, சினேகா தற்கொலை தடுப்பு உதவி மையம் - 044-24640050 ஆகிய எண்களை அழைக்கலாம்.