திருவள்ளூர் அருகே திருமணமாகி ஒரு மாதத்தைக் கூட நெருங்காத நிலையில், புதுப்பெண் ஒருவர் திடீரென மாயமாகியுள்ள சம்பவம் அப்பகுதியில் பெரும் பரபரப்பை ஏற்படுத்தியுள்ளது.

திருவள்ளூர் மாவட்டம் பட்டரைபெரும்புதூர் கிராமத்தைச் சேர்ந்த சந்திரசேகர் என்பவருக்கும், திருத்தணி அருகே உள்ள ராமாபுரம் கிராமத்தைச் சேர்ந்த நிவேதா என்பவருக்கும் கடந்த மாதம் (ஏப்ரல்) 20-ஆம் தேதி இரு வீட்டார் முன்னிலையில் கோலாகலமாகத் திருமணம் நடைபெற்றது. இனிதே தொடங்கிய இவர்களது இல்லற வாழ்க்கையில், சரியாக 23-வது நாளில் எதிர்பாராத திருப்பம் ஏற்பட்டுள்ளது.

கடந்த மே 13-ஆம் தேதி, சந்திரசேகர் தனது மனைவியுடன் அதே பகுதியில் உள்ள உறவினர் ஒருவரின் வீட்டுக்குச் சென்றிருந்தார். மனைவியை அங்கு விட்டுவிட்டு, அவருக்குப் பிடித்த இனிப்புகளை வாங்குவதற்காகச் சந்திரசேகர் திருவள்ளூர் பஜாருக்குச் சென்றார். ஆனால், அவர் இனிப்புகளுடன் மகிழ்ச்சியாகத் திரும்பி வந்தபோது, அங்கிருந்த நிவேதாவைக் காணவில்லை.

மனைவியைக் காணாமல் பதறிய சந்திரசேகர் அக்கம் பக்கத்திலும், உறவினர்களிடமும் தேடிப் பார்த்தார். எங்கு தேடியும் தகவல் கிடைக்காத நிலையில், நிவேதா திட்டமிட்டு அங்கிருந்து வெளியேறியது தெரியவந்தது.

இது குறித்துத் திருவள்ளூர் தாலுகா காவல் நிலையத்தில் புகார் அளிக்கப்பட்டுள்ளது. போலீசார் வழக்குப்பதிவு செய்து, குடும்பத் தகராறு காரணமா அல்லது வேறு ஏதேனும் காதல் விவகாரம் பின்னணியில் உள்ளதா என்ற கோணத்தில் தீவிர விசாரணை நடத்தி வருகின்றனர்.