சென்னை: இந்தியாவின் பாதுகாப்பு மற்றும் விண்வெளித் தயாரிப்புத் துறையில் (Aerospace & Defence) தமிழ்நாட்டை முன்னணி மாநிலமாக உருவாக்கும் நோக்கில் மாநில அரசு பல்வேறு நடவடிக்கைகளை தீவிரப்படுத்தியுள்ளது. பாதுகாப்புத் துறையில் உருவாகி வரும் முதலீட்டு மற்றும் உற்பத்தி வாய்ப்புகளை மாநிலத்தின் தொழில் நிறுவனங்கள், குறிப்பாக சிறு, குறு மற்றும் நடுத்தரத் தொழில் நிறுவனங்கள் (MSMEs) பயன்படுத்திக் கொள்ளும் வகையில் பல்வேறு விழிப்புணர்வு மற்றும் கலந்துரையாடல் நிகழ்ச்சிகள் நடத்தப்பட்டு வருகின்றன.

அதன் ஒரு பகுதியாக, மதுரையில் தமிழ்நாடு பாதுகாப்பு தொழில் வழித்தடம் (TNDIC) மற்றும் தமிழ்நாடு தொழில் வளர்ச்சி நிறுவனம் (TIDCO) இணைந்து தொழில்முனைவோர் சந்திப்பை நடத்தியது. இதில், இந்திய பாதுகாப்புத் துறையின் வளர்ச்சி மற்றும் அதில் தமிழ்நாட்டுக்கான வாய்ப்புகள் குறித்து விரிவாக விளக்கப்பட்டது.

கடந்த ஆண்டில் இந்தியாவின் பாதுகாப்புத் துறை உற்பத்தி ரூ.1.54 லட்சம் கோடியைத் தாண்டியுள்ளதாகவும், பாதுகாப்பு உபகரணங்களின் ஏற்றுமதி ரூ.38,000 கோடியை கடந்துள்ளதாகவும் தெரிவிக்கப்பட்டது. மேலும், 2029-ஆம் ஆண்டுக்குள் பாதுகாப்புத் துறை உற்பத்தியை ரூ.3 லட்சம் கோடியாகவும், ஏற்றுமதியை ரூ.50,000 கோடியாகவும் உயர்த்த மத்திய அரசு இலக்கு நிர்ணயித்துள்ளது.

இந்த வளர்ச்சியில் தமிழ்நாடு முக்கிய பங்கு வகிக்க வேண்டும் என்பதில் மாநில அரசு கவனம் செலுத்தி வருகிறது. எதிர்காலப் போர் வாகனங்கள், மேம்பட்ட போர் விமானங்கள், நீர்மூழ்கிக் கப்பல்கள், பராமரிப்பு மற்றும் பழுதுபார்ப்பு (MRO) மையங்கள், விண்வெளி உந்துவிசை தொழில்நுட்பங்கள் உள்ளிட்ட பல்வேறு திட்டங்களில் மாநில நிறுவனங்கள் இணையும் வாய்ப்புகள் இருப்பதாக அதிகாரிகள் தெரிவித்தனர்.

மேலும், iDEX, DRDO தொழில்நுட்ப மேம்பாட்டு நிதி, தொழில்நுட்ப பரிமாற்ற திட்டங்கள், 'ஸ்ரீஜன்' உள்நாட்டுமயமாக்கல் தளம் போன்ற மத்திய அரசின் திட்டங்களை பயன்படுத்தி, தமிழக நிறுவனங்கள் பாதுகாப்புத் துறையில் தங்களது பங்களிப்பை அதிகரிக்க அரசு வழிகாட்டி வருகிறது.

தமிழ்நாடு விண்வெளி மற்றும் பாதுகாப்பு தொழில் கொள்கையின் கீழ், புதிய முதலீடுகளை ஈர்க்கும் வகையில் பல்வேறு ஊக்கத் திட்டங்களும் அறிவிக்கப்பட்டுள்ளன. இதில்:

• கூடுதல் மூலதன மானியம்

• தரச்சான்றிதழ் பெற நிதியுதவி

• விற்பனையாளர் மேம்பாட்டு திட்டங்கள்

• பொது வசதி மையங்கள் (Common Facility Centres)

ஆகிய சலுகைகள் வழங்கப்படுகின்றன.

தொழில்நுட்ப மேம்பாட்டை ஊக்குவிக்கும் வகையில், சென்னை ஐஐடி (IIT Madras) மற்றும் டி.ஆர்.டி.ஓ (DRDO) ஆகியவற்றுடன் தமிழ்நாடு அரசு இணைந்து செயல்பட்டு வருகிறது. மேலும், சென்னை, கோவை, ஓசூர், திருச்சி மற்றும் மதுரை ஆகிய நகரங்களை மையமாகக் கொண்ட பாதுகாப்பு தொழில் வழித்தடம் (Defence Industrial Corridor) மூலம் தொழில் நிறுவனங்களுக்கு புதிய வாய்ப்புகள் உருவாக்கப்பட்டுள்ளன.

வரும் ஆகஸ்ட் 20 மற்றும் 21 ஆகிய தேதிகளில் புதுதில்லியில் நடைபெறவுள்ள தேசிய அளவிலான பாதுகாப்பு உற்பத்தி மாநாட்டை முன்னிட்டு, தமிழ்நாடு தனது பாதுகாப்புத் தொழில் கொள்கை, தொழில் மண்டலங்கள், சோதனை உள்கட்டமைப்பு மற்றும் மத்திய அரசிடம் எதிர்பார்க்கப்படும் ஆதரவுகள் தொடர்பான விரிவான அறிக்கையையும் தயாரித்துள்ளது.

இந்த முயற்சிகள் மூலம், இந்தியாவின் பாதுகாப்பு மற்றும் விண்வெளித் துறையில் முக்கிய உற்பத்தி மையமாக தமிழ்நாட்டை உருவாக்க மாநில அரசு தீவிரமாக செயல்பட்டு வருகிறது.