துபாயில் இருந்து டெல் அவிவ் சென்ற ‘ஃபிளை துபாய்’ (Boeing 737 MAX) விமானத்தில் நிகழ்ந்த தீவிரவாதக் கடத்தல் முயற்சியில், ஓமனைச் சேர்ந்த துணை பைலட் ஹமாம் அல் ஹமாமி, காக்பிட்டில் இருந்த அவசரகாலக் கோடாரியைப் (Crash Axe) பயன்படுத்தி இந்தியக் கேப்டன் ஸ்மித் மச்சாரைத் தாக்கியது ஐக்கிய அரபு அமீரக அரசுத் தரப்பு விசாரணையில் உறுதி செய்யப்பட்டுள்ளது. படுகாயமடைந்த நிலையிலும் கேப்டன் ஸ்மித் சாதுரியமாகக் காக்பிட் கதவைத் திறக்க, 4 இஸ்ரேலிய பயணிகள் உள்ளே புகுந்து ஹமாமியை மடக்கிப் பிடித்தனர். விமானம் சவுதி அரேபியாவின் தபூக் நகரில் தரையிறக்கப்பட்டு, குற்றவாளி தற்போது யுஏஇ சிறப்புப் புலனாய்வுக் குழுவிடம் ஒப்படைக்கப்பட்டுள்ளார்.

பன்னாட்டு ஊடகங்களின் தகவல்படி, பிரிட்டன் மற்றும் ஆஸ்திரேலியாவில் உயர்கல்வி பயின்ற ஹமாம், சிரியாவில் கழித்த காலத்தில் தீவிரவாதக் கருத்துகளால் ஈர்க்கப்பட்டுள்ளார். முன்னர் 'ஓமன் ஏர்' நிறுவனத்தில் பணியாற்றியபோது தீவிரவாதப் பொருட்கள் கண்டறியப்பட்டதால் அவருக்கு விமானம் இயக்கத் தடை விதிக்கப்பட்டிருந்தது. இருப்பினும், அவரது பின்னணியை முறையாக ஆராயாமல் 'ஃபிளை துபாய்' நிறுவனம் மிக முக்கிய சர்வதேச வழித்தடத்தில் அவரைப் பணியமர்த்தியது நிறுவனத்தின் பெரும் அலட்சியமாகப் பார்க்கப்படுகிறது.

சம்பவம் நடந்த 9 மணி நேரத்திற்குள் அவரது எக்ஸ் (X) கணக்கில் வெளியான பதிவுகளில், போயிங் 737 காக்பிட் வீடியோக்கள், அல்-காய்தா முன்னாள் தலைவர் அய்மான் அல்-ஜவாஹிரியின் படங்கள் மற்றும் மெக்கா, ஜெருசலேம் சித்தரிக்கப்பட்ட செயற்கை நுண்ணறிவு (AI) படங்கள் இடம்பெற்றிருந்தன. மேலும், பெண்களுக்கு எதிரான தீவிரவாத கருத்துகளையும் அவர் பதிவிட்டுள்ளது வெளிச்சத்திற்கு வந்துள்ளது. இச்சம்பவம் சர்வதேச விமானப் போக்குவரத்துப் பாதுகாப்பில் பெரும் விவாதத்தைக் கிளப்பியுள்ளது.