தென்மேற்கு வங்கக் கடலில் நிலவும் 'டிட்வா' புயல் காரணமாக ராமேஸ்வரம் பாம்பன் மற்றும் அதனைச் சுற்றியுள்ள பகுதிகளில் சூறைக்காற்று வீசி வருகிறது. இதன் விளைவாக, தங்கச்சிமடம் பகுதியில் குடியிருப்புப் பகுதிகளில் வெள்ளம் சூழ்ந்துள்ளது.

முன்னெச்சரிக்கை நடவடிக்கைகள்

முன்னெச்சரிக்கை நடவடிக்கையாக, தனுஷ்கோடி பகுதியிலிருந்து சுற்றுலாப் பயணிகள், வியாபாரிகள் மற்றும் பொதுமக்கள் அனைவரும் காவல்துறையினரால் பத்திரமாக வெளியேற்றப்பட்டுள்ளனர்.

மணிக்கு 10 கி.மீ. வேகத்தில் நகர்ந்து வந்த டிட்வா புயல், கடந்த சில மணி நேரங்களாக வேகம் குறைந்து, 3 கி.மீ. வேகத்தில் நகர்ந்து வருகிறது.

மாலை 4 மணி நிலவரப்படி, புயல் புதுச்சேரிக்கு 410 கி.மீ. தொலைவிலும், சென்னைக்குத் தெற்கே 500 கி.மீ. தொலைவிலும் நிலவுகிறது.

இது வடக்கு - வடமேற்கு திசையில் நகர்ந்து, நவம்பர் 30-ஆம் தேதி வட தமிழகம் அருகே நிலவும் என்று கணிக்கப்பட்டுள்ளது.

ரயில் சேவைகள் ரத்து மற்றும் மாற்றம்

புயலின் தாக்கத்தைக் கருத்தில் கொண்டு, ராமேஸ்வரத்திலிருந்து புறப்படும் சில ரயில் சேவைகளைத் தெற்கு ரயில்வே ரத்து செய்தும், மாற்றி அமைத்தும் அறிவித்துள்ளது:

ரத்து: ராமேஸ்வரத்திலிருந்து புறப்படும் ஓகா விரைவு ரயில் சேவை ரத்து செய்யப்பட்டுள்ளது.

ராமேஸ்வரம் - எழும்பூர் இடையே இயக்கப்படும் சேது விரைவு ரயில், ராமேஸ்வரத்துக்குப் பதிலாக மண்டபத்திலிருந்து புறப்படும்.

நாளை (நவ. 29) மதியம் 3 மணிக்குக் கிளம்ப வேண்டிய ராமேஸ்வரம் - திருச்சி ரயில், ராமேஸ்வரத்துக்குப் பதிலாக மானாமதுரையிலிருந்து புறப்படும்.