புதுச்சேரி மாநிலத்தில் கடந்த சில நாட்களாக வணிக ரீதியிலான சமையல் எரிவாயு சிலிண்டர்களுக்கு (Commercial Gas Cylinders) கடும் தட்டுப்பாடு ஏற்பட்டுள்ளது. இதன் காரணமாக உணவகங்கள், ஹோட்டல்கள் மற்றும் தேநீர் கடைகள் கடுமையாகப் பாதிக்கப்பட்டுள்ளன. 

இந்தத் தட்டுப்பாட்டைத் தொடர்ந்து, பொதுமக்களின் அத்தியாவசியத் தேவையான உணவுப் பொருட்களின் விலை கிடுகிடுவென உயர்ந்து வருவது சாமானிய மக்களைப் பெரும் கவலையில் ஆழ்த்தியுள்ளது.

பொதுவாக, பண்டிகை காலங்கள் மற்றும் விசேஷ நாட்களில் எரிவாயுத் தேவை அதிகரிப்பது வழக்கம். ஆனால், தற்போது முறையான விநியோகத்தில் ஏற்பட்டுள்ள சுணக்கம் காரணமாக, ஹோட்டல் உரிமையாளர்கள் சிலிண்டர்களைப் பெறுவதற்குப் பல நாட்கள் காத்திருக்க வேண்டிய சூழல் உருவாகியுள்ளது. 

சில இடங்களில் கூடுதல் விலைக்குச் சிலிண்டர்கள் விற்கப்படுவதாகவும் புகார்கள் எழுந்துள்ளன. இதனால் ஏற்படும் கூடுதல் உற்பத்திச் செலவைச் சமாளிக்க முடியாமல், ஹோட்டல் உரிமையாளர்கள் உணவுப் பொருட்களின் விலையை உயர்த்த வேண்டிய கட்டாயத்திற்குத் தள்ளப்பட்டுள்ளனர்.

குறிப்பாக, மதிய உணவு, சிற்றுண்டி மற்றும் தேநீர் உள்ளிட்டவற்றின் விலையில் குறிப்பிடத்தக்க உயர்வு காணப்படுகிறது. 

ஒரு டீ ரூ.10-லிருந்து ரூ.20-ஆக உயர்ந்துள்ளது.
ஒரு காபி ரூ.15-லிருந்து ரூ.30-ஆக உயர்ந்துள்ளது.
பூரி மற்றும் பொங்கல்: ரூ.30-லிருந்து ரூ.40-ஆக உயர்ந்துள்ளது.
இட்லி மற்றும் வடை: ரூ.6-லிருந்து ரூ.10-ஆக உயர்ந்துள்ளது.
பரோட்டா: ரூ.15-லிருந்து ரூ.20 முதல் ரூ.25 வரை உயர்ந்துள்ளது.
பிரியாணி மற்றும் சாப்பாடு: முறையே சராசரியாக ரூ.100 மற்றும் ரூ.150 வரை உயர்த்தப்பட்டுள்ளது.

ஏற்கனவே அத்தியாவசியப் பொருட்களின் விலை உயர்வால் அவதிப்பட்டு வரும் மக்களுக்கு, இது மேலும் ஒரு சுமையாக மாறியுள்ளது. "சிலிண்டர் தட்டுப்பாடு நீடித்தால், வரும் நாட்களில் உணவகங்களை நடத்துவது சாத்தியமற்றது" என்று சிறு உணவக உரிமையாளர்கள் வேதனையுடன் தெரிவிக்கின்றனர்.