தமிழக பாஜக முன்னாள் தலைவர் அண்ணாமலை, சினிமாவில் வன்முறை மற்றும் சாதி சார்ந்த காட்சிகளை முன்வைப்பதை கடுமையாக எதிர்த்துள்ளார். கோவையில் நடைபெற்ற பாஜக விவசாய அணி நிர்வாகிகள் கூட்டத்திற்குப் பிறகு செய்தியாளர்களை சந்தித்த அவர், குற்றச்சம்பவங்களை கட்டுப்படுத்துவதில் அரசும் சமூகமும் இணைந்து செயல்பட வேண்டும் என்று கருத்து தெரிவித்தார்.

சமீபத்தில் கோவையில் நடந்த மாணவி மரண விவகாரத்தில்,“காவல்துறை கோட்டை விட்டுள்ளது; தவறுகளை திருத்திக் கொண்டு செயல்பட வேண்டும். காவல்துறையை முதல்வர் ஸ்டாலின் மேலும் கடுமையாகக் கண்காணிக்க வேண்டும்”என்று அவர் நேரடியாகக் கூறினார்.

அண்ணாமலை மேலும்,“திரைப்படங்களில் வன்முறை, சாதி உணர்வுகளை தூண்டும் விஷயங்களை நிறுத்த வேண்டும். இது சமூகத்தில் தீய விளைவுகளை ஏற்படுத்துகிறது. சமூக அமைதி குலையாமல் இருக்க சினிமா உலகமும் பொறுப்பு ஏற்க வேண்டும்”
என்று வலியுறுத்தினார்.

நவம்பர் 19 ஆம் தேதி கோவையில் நடைபெறும் தென்னிந்திய இயற்கை வேளாண் மாநாட்டில் பிரதமர் மோடி கலந்து கொள்ளவுள்ளார்.
5,000க்கும் மேற்பட்ட இயற்கை விவசாயிகளும் விஞ்ஞானிகளும் இதில் பங்கேற்க உள்ளனர் என்று அண்ணாமலை தெரிவித்தார்.

வரவிருக்கும் 2026 தேர்தலைப்பற்றி அண்ணாமலை பதிலளிக்கையில்,“தமிழகத்தில் இன்னும் தேர்தல் சூடு பிடிக்கவில்லை. மக்கள் மனமும் இன்னும் தேர்தலுக்குத் தயாராகவில்லை. ஆனால் டிசம்பர் மாதத்துக்குள் அனைத்தும் சரியான கோணத்தில் விழும். என்டிஏ கூட்டணி உறுதியாகும். இறுதிப்போட்டிக்காக கூட்டணி தயாராகி வருகிறது”என்று தெளிவாகக் கூறினார்.

பீகார் தேர்தல் குறித்து,“பீகாரில் என்டிஏ வெற்றி பெறும்; அதுபோல தமிழகத்திலும் நடக்க வாய்ப்பு அதிகம்”என்று அவர் நம்பிக்கை தெரிவித்துள்ளார்.

அண்ணாமலைக்கு அரசியல் பக்கம் மீண்டும் திரும்பிய இந்த பயணம், பாஜக அமைப்பு மற்றும் கூட்டணி அரசியலில் புதிய மாற்றங்களை உருவாக்கும் என அரசியல் வட்டாரங்கள் கூறுகின்றன.