தூத்துக்குடி மாவட்டத்தின் ஸ்ரீவைகுண்டம் அருகிலுள்ள நல்ராஜபுரம் பகுதியைச் சேர்ந்த மூன்று இளம் நண்பர்கள், ஒரு சாதாரண பயணமாகத் தொடங்கிய அவர்களின் பயணம் திடீரென துயரத்தில் முடிந்தது. முத்துப்பாண்டி (21), சிவகணேஷ் (19), இசக்கிராஜா (20) ஆகியோர் நேற்று இருசக்கர வாகனத்தில் குலசேகரன்பட்டினம் கோவிலில் வழிபாடு முடித்து மீண்டும் சொந்த ஊருக்கு திரும்பிக் கொண்டிருந்தனர்.

ஆழ்வார்திருநகரி அரசாங்க நகர் அருகே வந்தபோது, எதிர்பாராத விதமாக வாகனம் கட்டுப்பாட்டை இழந்து சாலையோரத்தில் இருந்த குத்துக்கல் மற்றும் கால்வாயில் மோதியது.

கணநேரத்தில் நிகழ்ந்த இந்த கோர விபத்தில், முத்துப்பாண்டி தலையில் கடுமையான காயமடைந்து ரத்த வெள்ளத்தில் சம்பவ இடத்திலேயே உயிரிழந்தார்.

இந்த விபத்தில் படுகாயமடைந்த மற்ற இருவரையும் விரைந்து சென்ற காவலர்கள் மீட்டு, 108 ஆம்புலன்ஸ் மூலம் ஸ்ரீவைகுண்டம் அரசு மருத்துவமனைக்கு அனுப்பி வைத்தனர்.

அங்கு சிகிச்சை பெற்று வந்த இசக்கிராஜா, உயிர் பிழைக்க முடியாமல் இன்று உயிரிழந்ததாக தெரிவிக்கப்படுகிறது.இதன் மூலம் உயிரிழந்தவர்களின் எண்ணிக்கை இரண்டாக உயர்ந்துள்ளது.

மற்றொரு இளைஞரான சிவகணேஷ், பலத்த காயங்களுடன் மருத்துவமனையில் தீவிர சிகிச்சையில் உள்ளார்.இந்த துயர சம்பவம் குறித்து ஆழ்வார்திருநகரி காவலர்கள் வழக்குப்பதிவு செய்து, விபத்தின் காரணங்களை தீவிரமாக ஆராய்ந்து வருகின்றனர் என்று தெரிவிக்கப்படுகிறது.