அதிமுக பொதுச்செயலாளர் எடப்பாடி பழனிசாமி இன்று கோபிசெட்டிப்பாளையம் தொகுதி நல்ல கவுண்டன்பாளையத்தில் அமைந்துள்ள முத்து மஹால் திருமண மண்டபத் திடலில் சிறப்புப் பொதுக்கூட்டம் நடத்தினார். இதில் ஏராளமான தொண்டர்கள் கலந்துகொண்டனர். இந்நிலையில் இ.பி.எஸ்-இன் பரப்புரை கூட்டத்திற்கு வந்திருந்த ஒருவர் மயங்கி விழுந்து உயிரிழந்துள்ளார். இந்த சம்பவம் சோகத்தை ஏற்படுத்தியுள்ளது.

கொண்டையம்பாளையத்தைச் சேர்ந்த 43 வயதான அர்ஜூனன் என்பவர் எடப்பாடி பழனிசாமி பங்கேற்ற இன்றைய பரப்புரை கூட்டத்தில் நின்று கொண்டிருந்த போது, திடீரென மயங்கி கீழே விழுந்துள்ளார். உடனடியாக அங்கிருந்தவர்கள் அவரை மீட்டு கோபி செட்டிபாளையம் அரசு மருத்துவமனைக்குக் கொண்டு சென்றுள்ளனர்.

ஆனால், குறித்த நபர் மருத்துவமனைக்கு கொண்டுவரும் வழியிலேயே உயிரிழந்து விட்டதாக மருத்துவர்கள் தெரிவித்த்துள்ளனர். எடப்பாடி பழனிச்சாமியின் பிரசாரக் கூட்டத்தில் நடந்த இந்தத் திடீர் உயிரிழப்பு குறித்துக் கோபிசெட்டிபாளையம் போலீசார் வழக்குப்பதிவு செய்து விசாரணை மேற்கொண்டு வருகின்றனர். அத்துடன், அர்ஜுனனின் உயிரிழப்புக்குக் மாரடைப்பு காரணம் என கூறப்படுகிறது.

இந்நிலையில், அர்ஜுனன் அவர்கள், திடீர் மாரடைப்பால் மரணமடைந்தமைக்கு எடப்பாடி பழனிசாமி அவரது குடும்பத்தினருக்கு ஆறுதல் தெரிவித்துள்ளதோடு, வருத்தங்களையும் தெரிவித்துள்ளார்.  இது குறித்து அவர் வெளியிட்டுள்ள அறிக்கையில் குறிப்பிட்டுள்ளதாவது:

''இன்று, கோபிசெட்டிப்பாளையத்தில் நடைபெற்ற எழுச்சிப்பயணப் பொதுக்கூட்டத்திற்கு வந்த கொண்டையமபாளையம் பகுதியைச் சேர்ந்த திரு. அர்ஜுனன் அவர்கள், திடீர் மாரடைப்பால் உயிரிழந்ததாக வரும் செய்தி அறிந்து மிகுந்த வருத்தம் அடைந்தேன். 

திரு. அர்ஜுனன் அவர்களை இழந்து வாடும் குடும்பத்தாருக்கு எனது ஆழ்ந்த இரங்கலையும் வருத்தத்தையும் தெரிவித்துக்கொள்வதுடன், மறைந்த அவர்தம் ஆன்மா இறைவன் திருவடி நிழலில் இளைப்பாற எல்லாம் வல்ல இறைவனை வேண்டுகிறேன். '' என்று கூறியுள்ளார்.

கடந்த செப்டம்பர் மாதம் 27-ஆம் தேதி சனிக்கிழமையன்று தவெக தலைவர் விஜயின் கரூர் பரப்புரையின் போது ஏற்பட்ட கூட்ட நெரிசலில் சிக்கி 41 பேர் உயிரிழந்தனர். பலர் காயமடைந்தனர். இந்த சம்பவம்  நாடு முழுவதும் பெரும் சோகத்தையும் அதிர்ச்சியையும் ஏற்படுத்தியிருந்தமை குறிப்பிடத்தக்கது.

இன்று, கோபிசெட்டிப்பாளையத்தில் நடைபெற்ற எழுச்சிப்பயணப் பொதுக்கூட்டத்திற்கு வந்த கொண்டையமபாளையம் பகுதியைச் சேர்ந்த
திரு. அர்ஜுனன் அவர்கள், திடீர் மாரடைப்பால் உயிரிழந்ததாக வரும் செய்தி அறிந்து மிகுந்த வருத்தம் அடைந்தேன்.

திரு. அர்ஜுனன் அவர்களை இழந்து வாடும் குடும்பத்தாருக்கு…

— Edappadi K Palaniswami-SayYEStoWomenSafety&AIADMK (@EPSTamilNadu) November 30, 2025