இந்திய அணியின் முன்னாள் கேப்டனான விராட் கோலி மீண்டும் தனக்கு ஏற்ற முறையில் அசத்தி, ஒருநாள் கிரிக்கெட்டில் தனது 53வது சதத்தை பதிவு செய்துள்ளார். தென்னாப்பிரிக்காவுக்கு எதிராக இன்று ராய்ப்பூரில் நடைபெற்ற இரண்டாவது ஒருநாள் போட்டியில் அவர் வெளிப்படுத்திய ஆட்டம் ரசிகர்களை உற்சாகப்படுத்தியது.

முதலில் பேட்டிங் செய்த இந்திய அணி, 50 ஓவர்களில் 8 விக்கெட்டுக்கு 358 ரன்கள் எடுத்தது. இதில் ருதுராஜ் கெய்க்வாட் 105 ரன்களும், விராட் கோலி 93 பந்துகளில் 7 பவுண்டரி, 2 சிக்ஸர் அடித்து 102 ரன்களும் சேர்த்தனர்.

சில நாட்களுக்கு முன் ராஞ்சியில் 52வது சதத்தை பதிவு செய்திருந்த கோலி, இன்று மீண்டும் சதம் அடித்து தொடர்ந்து இரண்டு போட்டிகளில் நூறு ரன்கள் குவித்துள்ளார். இதன் மூலம் ஒருநாள் கிரிக்கெட்டில் 53 சதங்களை பதிவு செய்தவர் என்ற பெருமை அவருக்கு கிடைத்துள்ளது.

மேலும், இந்த சதத்தால் சச்சின் டெண்டுல்கரின் இன்னொரு சாதனையை அவர் சமன் செய்துள்ளார். ஒருநாள் போட்டிகளில் அதிகமான வெவ்வேறு மைதானங்களில் சதம் அடித்த வீரர்கள் பட்டியலில், சச்சின் 34 மைதானங்களில் சதம் அடித்திருந்தார். இன்று கோலியும் தனது 34வது மைதான சதத்தை பதிவு செய்து, சச்சினுடன் இணைந்துள்ளார்.

இந்த சாதனையைத்தொடர்ந்து, 359 ரன்கள் என்ற பெரிய இலக்கை நோக்கி தென்னாப்பிரிக்க அணி தற்போது விளையாடி வருகிறது.