இந்தியா மற்றும் நியூசிலாந்து அணிகளுக்கு இடையேயான 3 போட்டிகள் கொண்ட ஒருநாள் கிரிக்கெட் தொடரின் இரண்டாவது போட்டி இன்று (ஜனவரி 14) ராஜ்கோட் மைதானத்தில் நடைபெற்று வருகிறது. இந்தப் போட்டியில் டாஸ் வென்ற நியூசிலாந்து அணி முதலில் பந்துவீச்சை தேர்வு செய்தது. அதனைத் தொடர்ந்து முதலில் பேட்டிங் செய்த இந்திய அணி, 50 ஓவர்கள் முடிவில் 7 விக்கெட்டுகளை இழந்து 284 ரன்களை குவித்தது.

இந்திய அணியின் இன்னிங்ஸில் விக்கெட் கீப்பர் பேட்ஸ்மேனான கே.எல். ராகுல் அபாரமாக விளையாடி அணியை காப்பாற்றினார். 92 பந்துகளை சந்தித்த அவர், 11 பவுண்டரி மற்றும் ஒரு சிக்சர் உதவியுடன் 112 ரன்கள் குவித்து ஆட்டமிழக்காமல் இறுதிவரை களத்தில் இருந்தார். இது அவரது சர்வதேச ஒருநாள் கிரிக்கெட் வாழ்க்கையில் எட்டாவது சதமாகும்.

இந்தப் போட்டியில் இந்திய அணி 118 ரன்களுக்கு 4 விக்கெட்டுகளை இழந்து தடுமாறிய நிலையில், ஐந்தாவது வீரராக களமிறங்கிய கே.எல். ராகுல், பின்வரிசை வீரர்களுடன் பொறுப்பான பேட்டிங்கை வெளிப்படுத்தி சிறப்பான கூட்டணிகளை அமைத்தார். அழுத்தமான சூழலில் அவர் வெளிப்படுத்திய அமைதியான ஆட்டம் ரசிகர்கள் மற்றும் கிரிக்கெட் விமர்சகர்களிடையே பெரும் பாராட்டை பெற்றுள்ளது.

இந்த சதத்தின் மூலம் கே.எல். ராகுல் ஒரு புதிய சாதனையையும் படைத்துள்ளார். ராஜ்கோட் மைதானத்தில் சர்வதேச ஒருநாள் போட்டியில் சதம் அடித்த முதல் இந்திய விக்கெட் கீப்பர் பேட்ஸ்மேன் என்ற பெருமையை அவர் பெற்றுள்ளார். இதற்கு முன் எம்.எஸ். தோனி, ரிஷப் பண்ட் உள்ளிட்ட விக்கெட் கீப்பர்கள் யாரும் இந்த மைதானத்தில் அந்த சாதனையை நிகழ்த்தியதில்லை என்பது குறிப்பிடத்தக்கது.

மேலும், 2016 ஆம் ஆண்டு சர்வதேச ஒருநாள் கிரிக்கெட்டில் அறிமுகமான கே.எல். ராகுல், இதுவரை 93 போட்டிகளில் விளையாடி 7 சதங்கள் மற்றும் 20 அரைசதங்களுடன் மொத்தமாக 3,247 ரன்களை குவித்துள்ளார். ஒருநாள் போட்டிகளில் எம்.எஸ். தோனியின் சராசரி 50.23 ஆக இருக்கும் நிலையில், கே.எல். ராகுல் 51.67 என்ற உயர்ந்த சராசரியுடன் அவரை கடந்துள்ளதும் குறிப்பிடத்தக்க விஷயமாக பார்க்கப்படுகிறது.

அழுத்தமான தருணங்களில் பொறுப்புடன் விளையாடி இந்திய அணிக்கு வலுவான ஸ்கோரை அமைத்துக் கொடுத்த கே.எல். ராகுலின் இந்த இன்னிங்ஸ், போட்டியின் முக்கிய திருப்புமுனையாக அமைந்துள்ளது.