உலகின் முன்னணி தகவல் தொடர்பு செயலியான வாட்ஸ்ஆப் (WhatsApp), பயனர்களின் தனியுரிமையைப் (Privacy) பாதுகாக்கும் நோக்கில் புதிய யூஸர்நேம்' (Username) அம்சத்தை அறிமுகப்படுத்தத் திட்டமிட்டிருந்தது. இதன் மூலம், பயனர்கள் தங்களின் மொபைல் எண்களை வெளிப்படையாகப் பகிராமலேயே மற்றவர்களுடன் எளிதாக உரையாட முடியும். இதற்கான ஆரம்பகட்ட முன்பதிவு நடைமுறைகள் தொடங்கப்பட்ட நிலையில், இந்தியாவின் மத்திய அரசு இந்த புதிய அம்சத்திற்கு தற்போது தற்காலிகத் தடை விதித்து அதிரடி உத்தரவு பிறப்பித்துள்ளது.

தடையின் பின்னணி மற்றும் பாதுகாப்பு கவலைகள்

மொபைல் எண்கள் மறைக்கப்பட்டு யூஸர்நேம்கள் மட்டுமே முன்னிறுத்தப்படும் போது, ஆன்லைன் மோசடிகள், ஃபிஷிங் (Phishing) மற்றும் 'டிஜிட்டல் அரெஸ்ட்' (Digital Arrest) போன்ற சைபர் குற்றங்கள் பெருமளவில் அதிகரிக்கக்கூடும் என்று மத்திய மின்னணு மற்றும் தகவல் தொழில்நுட்ப அமைச்சகம் கவலை தெரிவித்துள்ளது.

மேலும், செல்போன் எண் இல்லாத பட்சத்தில், குற்றச் செயல்களில் ஈடுபடும் அநாமதேய நபர்களைக் கண்காணிப்பதிலும், போலி கணக்குகளைக் கண்டறிவதிலும் சைபர் கிரைம் போலீசாருக்குப் பெரும் சவால்கள் ஏற்படும் என்று அரசு தரப்பில் சுட்டிக்காட்டப்பட்டுள்ளது. தேசிய பாதுகாப்பு மற்றும் பொதுமக்களின் பாதுகாப்பில் எந்தவித சமரசமும் செய்ய முடியாது என்பதால், இந்த புதிய செயல்பாட்டின் சட்டப்பூர்வ தன்மைகள் குறித்து முழுமையாக ஆய்வு செய்ய அரசு முடிவு செய்துள்ளது.

மெட்டாவிற்கு அனுப்பப்பட்ட நோட்டீஸ்

இதன் தொடர்ச்சியாக, வாட்ஸ்ஆப்பின் தாய் நிறுவனமான மெட்டாவிற்கு (Meta) மத்திய அரசு நோட்டீஸ் அனுப்பியுள்ளது. இந்த புதிய யூஸர்நேம் அம்சம் எவ்வாறு செயல்படுகிறது, இதில் என்னென்ன பாதுகாப்பு வழிமுறைகள் உள்ளன, மற்றும் மோசடிகளைத் தடுக்க என்னென்ன பாதுகாப்பு அடுக்குகள் கையாளப்படவுள்ளன என்பது குறித்து அடுத்த 3 நாட்களுக்குள் விரிவான விளக்கம் அளிக்குமாறு உத்தரவிடப்பட்டுள்ளது. அரசின் முழுமையான ஆலோசனை மற்றும் திருப்திகரமான ஆய்வு முடிவடையும் வரை இந்த வசதியை இந்தியாவில் வெளியிடக் கூடாது என்றும் தெளிவாக அறிவுறுத்தப்பட்டுள்ளது.

வாட்ஸ்ஆப் நிறுவனத்தின் விளக்கம்

மத்திய அரசின் இந்த நடவடிக்கைக்கு வாட்ஸ்ஆப் அதிகாரிகள் தரப்பில் விளக்கமளிக்கப்பட்டுள்ளது:

கூடுதல் பாதுகாப்பு அடுக்கு: இந்த யூஸர்நேம் வசதி என்பது மொபைல் எண்களை மாற்றுவதற்காக அல்ல, மாறாக குழு உரையாடல்களில் தனியுரிமைக்கான ஒரு கூடுதல் பாதுகாப்பு அடுக்கு மட்டுமே. கணக்கைத் தொடங்க இன்னும் மொபைல் எண் கட்டாயமே.

 ஆள்மாறாட்டத் தடுப்பு: போலிக் கணக்குகள் மற்றும் ஆள்மாறாட்டத்தைத் (Impersonation) தடுக்கப் பல அடுக்கு பாதுகாப்பை உருவாக்கியுள்ளோம்.

முக்கிய பெயர்கள் முடக்கம்: அரசு அமைப்புகள், பிரபலங்கள், பொதுப் பிரமுகர்கள் மற்றும் சரிபார்க்கப்பட்ட மெட்டா கணக்குகளின் பெயர்களைப் போலியாகப் பயன்படுத்துவதைத் தவிர்க்க, அந்த முக்கியப் பெயர்களைப் பாதுகாப்பாக முடக்கி வைத்துள்ளோம். இதனால் பிறர் அந்தப் பெயர்களைப் பயன்படுத்த முடியாது.

பாதுகாப்பு மற்றும் தனியுரிமைக்கு இடையேயான இந்த விவாதம் முழுமையான அரசு ஆய்வுக்குப் பிறகே ஒரு முடிவுக்கு வரும் எனத் தெரிகிறது.!