தமிழக அரசியல் களம் சூடுபிடித்துள்ள நிலையில், நடிகரும் அரசியல்வாதியுமான விஜய், எதிர்க்கட்சிகளின் கூட்டணி கணக்கீடுகளில் ஒரு முக்கிய மையப் புள்ளியாக உருவெடுத்துள்ளார் என டெல்லி பாஜக வட்டாரங்கள் தெரிவிக்கின்றன. விஜயின் அரசியல் பேச்சுகளும், திமுக எதிர்ப்பு நிலைப்பாடும், பாஜகவின் தற்போதைய அரசியல் நோக்கங்களுடன் பல இடங்களில் ஒத்துப்போகின்றன என்ற கருத்து பாஜக தலைமையிடத்தில் வலுப்பெற்றுள்ளதாக கூறப்படுகிறது.

திமுகவை தோற்கடிக்க வேண்டுமெனில், திமுக எதிர்ப்பு வாக்குகள் ஒன்றிணைய வேண்டும் என்றும், வாக்குகள் சிதறினால் அது ஆளும் கட்சிக்கே சாதகமாக அமையும் என்றும் டெல்லி தலைமை தீவிரமாக நம்புகிறது. அந்த வகையில், விஜயின் பொது உரைகள் திமுக ஆட்சியை அகற்ற வேண்டும் என்ற மனநிலையை வெளிப்படுத்துவதாகவும், அவரது விமர்சனங்கள் பெரும்பாலும் திமுகவை நோக்கியே இருப்பதாகவும் பாஜக வட்டாரங்கள் கருதுகின்றன.

பாஜக – தவெக (தமிழக வெற்றிக் கழகம்) இடையே இதுவரை அதிகாரப்பூர்வ கூட்டணி இல்லாவிட்டாலும், திமுக எதிர்ப்பு அரசியலில் விஜய் ஒரு செல்வாக்கு மிக்க சக்தியாக செயல்படுகிறார் என்பதில் பாஜக மூத்த தலைவர்கள் ஒருமித்த கருத்தில் உள்ளனர். தமிழகத்தில் தேசிய ஜனநாயகக் கூட்டணி (NDA) ஆட்சிக்கு வந்தால், அதில் பாஜகவும் முக்கிய பங்காளியாக இருக்கும் என்றும், அதிமுக மாநில அளவிலான வியூகத்தில் தொடர்ந்தும் முக்கிய இடம் வகிக்கும் என்றும் வட்டாரங்கள் தெரிவிக்கின்றன.

இதற்கிடையே, தமிழகத்தில் மாற்று அரசியல் சக்தியாக தன்னை நிலைநிறுத்த முயலும் விஜயின் தவெகவுடன் கூட்டணி அமைக்கும் சாத்தியக்கூறுகளை பாஜக தீவிரமாக ஆய்வு செய்து வருகிறது. சமீபத்தில், “மதச்சார்பின்மை அடிப்படையில் காங்கிரஸ் இயல்பான கூட்டாளி” என்று தவெக அறிவித்த பிறகே, பாஜகவின் முயற்சிகள் வேகம் பெற்றுள்ளதாக கூறப்படுகிறது. காங்கிரஸுடன் தவெக கூட்டணி அமைப்பதற்கு முன்பே, தவெகவை தங்கள் பக்கம் இழுக்க வேண்டும் என்ற திட்டத்தில் பாஜக செயல்படுகிறது என தகவல்கள் வெளியாகின்றன.

இந்தச் சூழலில், பிரதமர் நரேந்திர மோடி ஜனவரி 23ஆம் தேதி சென்னையின் புறநகரில் நடைபெறவுள்ள NDA-வின் முதல் மாபெரும் கூட்டத்தில் உரையாற்றவுள்ளார். பாமக இணைந்த பிறகு, கூட்டணிக் கட்சிகள் அனைத்தும் இந்தக் கூட்டத்தில் பங்கேற்கும் என எதிர்பார்க்கப்படுகிறது. பிரதமரின் வருகைக்கு முன்னதாகவே, மேலும் சில கட்சிகளை NDA-வில் இணைக்க பாஜக பேச்சுவார்த்தை நடத்தி வருவதாகவும் கூறப்படுகிறது.

அதே நேரத்தில், அமித் ஷா தமிழக வருகையின் போது கட்சி மையக் குழு கூட்டத்தில், “வரவிருக்கும் சட்டமன்றத் தேர்தலில் வெற்றியே முதன்மை இலக்கு” என வலியுறுத்தியதாக தகவல்கள் தெரிவிக்கின்றன. 2021 சட்டமன்றத் தேர்தலில் நான்கு இடங்களே பெற்ற பாஜக, 2024 மக்களவைத் தேர்தலில் ஒரு இடத்தையும் பெறாத பின்னணியில், இந்த அறிவுறுத்தல் முக்கியத்துவம் பெறுகிறது. கூட்டணித் தலைவர் எடப்பாடி பழனிச்சாமியை அமித் ஷா திட்டமிட்டு சந்திக்காதது, NDA-வில் ஒரே ஒரு கட்சிக்கு மட்டுமே முக்கியத்துவம் இல்லை; திமுக எதிர்ப்பு அனைத்து சக்திகளையும் ஒருங்கிணைப்பதே நோக்கம் என்ற செய்தியை வெளிப்படுத்துவதற்காகவே என வட்டாரங்கள் கூறுகின்றன.

இந்த அரசியல் நகர்வுகளின் மையத்தில் விஜய் தொடர்ந்து முக்கியத்துவம் பெறுகிறார். இருப்பினும், விஜய் இதுவரை பாஜகவை தனது கருத்தியல் எதிரியாகவே சுட்டிக்காட்டி வருகிறார். பாஜகவுடன் எந்தவித கூட்டணியும் இல்லை என்றும், தனது நிலைப்பாட்டில் மாற்றம் இல்லை என்றும் தவெக மூத்த தலைவர்கள் தெரிவிக்கின்றனர். தவெக பேரணியில் நடந்த உயிரிழப்பு தொடர்பான சிபிஐ விசாரணை, விஜயின் ஜனநாயகன் திரைப்படம் எதிர்கொள்ளும் சென்சார் சிக்கல் உள்ளிட்ட பிரச்சனைகள் இருந்தாலும், அவரது அரசியல் நிலைப்பாடு மாறவில்லை என்பதே கட்சி வட்டாரங்களின் நிலைபாடு.

ஆனால் மறுபுறம், சிபிஐ சம்மன், வருமான வரி வழக்குகள், திரைப்பட விவகாரங்கள் போன்ற பல அழுத்தங்கள் காரணமாக, எதிர்காலத்தில் அரசியல் சமன்பாடுகள் மாறினாலும் அதில் வியப்பில்லை என சில தவெக நிர்வாகிகளே தனிப்பட்ட முறையில் கருத்து தெரிவிப்பதாக அரசியல் வட்டாரங்களில் பேசப்படுகிறது. இதனால், வரும் மாதங்களில் விஜயை மையமாகக் கொண்டு தமிழக அரசியல் மேலும் பரபரப்பை அடையும் என்பதில் சந்தேகம் இல்லை.