தமிழகத்தில் காலியாக உள்ள 5 சட்டமன்றத் தொகுதிகளுக்கான இடைத்தேர்தலுக்கு விதிக்கப்பட்டுள்ள தடையை நீக்கக் கோரி, முதல்வர் விஜய் தரப்பில் சென்னை உயர்நீதிமன்றத்தில் இன்று மனுத் தாக்கல் செய்யப்பட்டுள்ளதாக தகவல் வெளியாகியுள்ளது. இடைத்தேர்தலை நடத்துவதற்கு இன்னும் கால அவகாசம் இருக்கும் நிலையில், விஜய் தரப்பு ஏன் இப்போதே நீதிமன்றத்தை நாடியுள்ளது என்பதன் பின்னணியில் முக்கியமான அரசியல் கணக்கு இருப்பதாக கூறப்படுகிறது.

தமிழகத்தில் தற்போது 7 சட்டமன்றத் தொகுதிகள் காலியாக உள்ளன. இதில் திருச்சி கிழக்கு, கரூர், விராலிமலை, பெருந்துறை, அம்பாசமுத்திரம் ஆகிய 5 தொகுதிகளில் வெற்றி பெற்ற உறுப்பினர்களின் வெற்றியை எதிர்த்து சென்னை உயர்நீதிமன்றத்தில் வழக்குகள் தொடரப்பட்டுள்ளன. இந்த வழக்குகள் நிலுவையில் இருப்பதால், 5 தொகுதிகளுக்கும் இடைத்தேர்தல் அறிவிப்பை வெளியிட செப்டம்பர் 8-ம் தேதி வரை நீதிமன்றம் தடை விதித்துள்ளதாக கூறப்படுகிறது.

இந்தத் தடை முடிவடைய இன்னும் சில நாட்களே உள்ள நிலையில், இடைத்தேர்தலை நடத்த தேர்தல் ஆணையத்துக்கு நவம்பர் 4-ம் தேதி வரை அவகாசம் இருப்பதாக கூறப்படுகிறது. தேர்தல் அறிவிப்புக்கான எந்தத் தெளிவான அறிகுறியும் இதுவரை தெரியாத சூழலில், விஜய் தரப்பில் முன்கூட்டியே நீதிமன்றத்தை அணுகியிருப்பது அரசியல் வட்டாரத்தில் கவனம் பெற்றுள்ளது.

இதன் பின்னணி குறித்து தேர்தல் ஆணைய வட்டாரங்களில் விசாரித்தபோது, தேர்தல் நடைமுறைகளை நிறைவு செய்ய குறைந்தபட்சம் 28 நாட்கள் தேவைப்படுவதாகவும், நவம்பர் 4-ம் தேதிக்குள் தேர்தலை நடத்தி முடிக்க வேண்டுமெனில் மிகக் குறைந்த கால அவகாசமே இருப்பதாகவும் கூறப்படுகிறது.

மேலும், செப்டம்பர் 8-ம் தேதி இந்த 5 தொகுதிகள் தொடர்பான தேர்தல் வழக்குகள் மீண்டும் விசாரணைக்கு வரும்போது, தடை உத்தரவு மேலும் சில வாரங்களுக்கு நீட்டிக்கப்பட்டால் அது தவெக அரசுக்கு அரசியல் பின்னடைவாக அமையலாம் என அக்கட்சி தரப்பில் கருதப்படுவதாக தெரிகிறது.

ஒருவேளை தேர்தல் ஆணையம் இடைத்தேர்தல் தேதியை அறிவிக்கும் நேரம் வரை இந்தத் தடை நீடித்தால், தேர்தல் வழக்கு இல்லாத தாராபுரம் மற்றும் மதுராந்தகம் ஆகிய இரண்டு தொகுதிகளுக்கு மட்டுமே இடைத்தேர்தல் நடத்தும் சூழல் உருவாகலாம் என்றும் கூறப்படுகிறது.

ஆனால், இந்த இரண்டு தொகுதிகளைவிட திருச்சி கிழக்கு தொகுதியில் இடைத்தேர்தல் நடைபெற வேண்டும் என்பதில் முதல்வர் விஜய் அதிக ஆர்வம் காட்டுவதாக கூறப்படுகிறது. அதேபோல், தவெகவுடன் இணைந்துள்ள முன்னாள் அதிமுக எம்.எல்.ஏ.க்களான கரூர் விஜயபாஸ்கர் மற்றும் விராலிமலை விஜயபாஸ்கர் ஆகியோருடன் தொடர்புடைய தொகுதிகளிலும் குறிப்பிட்ட காலக்கெடுவுக்குள் தேர்தல் நடைபெற வேண்டும் என தவெக விரும்புவதாக தகவல்கள் தெரிவிக்கின்றன.

இந்தத் தொகுதிகளுக்கு தேர்தல் வழக்குகள் காரணமாக இடைத்தேர்தல் தாமதமாகிவிடக் கூடாது என்பதற்காகவே, விஜய் பெயரில் நேரடியாக மனுத் தாக்கல் செய்யப்பட்டுள்ளதாக கூறப்படுகிறது. இதன் மூலம் இந்த விவகாரத்தில் முதல்வரின் நேரடி தலையீடு வெளிப்படுத்தப்பட்டுள்ளதாகவும் தவெக வட்டாரங்கள் கருதுகின்றன.

செப்டம்பர் 8-ம் தேதி வழக்கு விசாரணைக்கு வரும்போது, விஜய் தரப்பு தாக்கல் செய்துள்ள மனுவையும் நீதிமன்றம் கருத்தில் கொள்ளும் என்பதால், தேர்தல் தடை மேலும் நீட்டிக்கப்படாது என்ற நம்பிக்கையில் முதல்வர் மற்றும் அமைச்சர்கள் இருப்பதாக தகவல்கள் வெளியாகியுள்ளன.

இதற்கிடையே, விஜய்யின் மனுத்தாக்கலை அதிமுக தரப்பு வழக்கறிஞர்கள் கவனித்துள்ளதாகவும் கூறப்படுகிறது. இதுகுறித்து அதிமுக தரப்பில், தேர்தல் வெற்றி தொடர்பான வழக்குகள் மட்டுமின்றி, ராஜினாமா செய்த 6 அதிமுக எம்.எல்.ஏ.க்களுக்கு எதிராக தகுதி நீக்க நடவடிக்கை கோரி தொடரப்பட்டுள்ள வழக்கும் நிலுவையில் இருப்பதாக சுட்டிக்காட்டப்பட்டுள்ளது.

அந்த 6 தொகுதிகளில் இடைத்தேர்தல் நடத்துவதற்கு முன்பாக தகுதி நீக்க வழக்கு முடிவுக்கு வர வேண்டும் என்பதே தங்களது நிலைப்பாடு என்றும், தேர்தல் ஆணையம் அதையும் மீறி தேர்தலை நடத்த முயன்றால் சட்டரீதியாக எதிர்கொள்ள நடவடிக்கை எடுக்கப்படும் என்றும் அதிமுக வழக்கறிஞர்கள் தரப்பில் தெரிவிக்கப்பட்டுள்ளதாக கூறப்படுகிறது.

அதேநேரத்தில், திருச்சி கிழக்கு தொகுதியில் இடைத்தேர்தல் நடத்துவதற்கு தங்களுக்கு எந்த ஆட்சேபனையும் இல்லை என்றும் அதிமுக தரப்பு தெரிவித்துள்ளதாக தகவல் வெளியாகியுள்ளது.

இதனால், 7 தொகுதிகளுக்கான இடைத்தேர்தல் விவகாரம் வெறும் தேர்தல் ஆணையத்தின் முடிவாக இல்லாமல், நீதிமன்ற வழக்குகள், ஆளுங்கட்சியின் சட்டப்பேரவை பலம் மற்றும் கூட்டணிக் கணக்குகள் என பல்வேறு அம்சங்களுடன் சூடுபிடித்துள்ளது. செப்டம்பர் 8-ம் தேதி நடைபெற உள்ள அடுத்தகட்ட விசாரணை, இந்த இடைத்தேர்தல் அரசியலில் முக்கிய திருப்புமுனையாக அமையுமா என்பதே தற்போதைய எதிர்பார்ப்பாக உள்ளது.