இந்தியா டுடே - சி வோட்டர் கருத்துக்கணிப்பில் 9.2 சதவீத ஆதரவுடன் விஜய் மூன்றாவது இடத்தைப் பிடித்ததாக வெளியான தகவலும், 2029 நாடாளுமன்றத் தேர்தலில் சுமார் 100 தொகுதிகளை குறிவைத்து தவெக தேசிய அரசியலை நோக்கி நகர்வதாக கூறப்படும் தகவலும் தேசிய அரசியல் களத்தில் பேசுபொருளாகியுள்ளன.

2029-ல் விஜய்யை பிரதமர் வேட்பாளராக முன்னிறுத்தும் நோக்கத்துடன் தவெக தனது அரசியல் எல்லையை தமிழ்நாட்டைத் தாண்டி விரிவுபடுத்த முயற்சிப்பதாக கூறப்படுகிறது. ஆனால், விஜய்யின் இந்த நகர்வு காங்கிரஸ் தலைமையிலான எதிர்க்கட்சிகளுக்கு பின்னடைவை ஏற்படுத்தி, மறைமுகமாக பாஜகவுக்கே தேர்தல் ஆதாயத்தை உருவாக்குமா என்ற புதிய விவாதம் அரசியல் வட்டாரங்களில் எழுந்துள்ளது.

மத்தியில் ஆளும் பாஜக அரசுக்கு எதிரான வாக்குகளை ஒருங்கிணைத்து, 2029-ல் ஆட்சியை கைப்பற்ற வேண்டும் என்பதே காங்கிரஸ் மற்றும் அதன் கூட்டணிக் கட்சிகளின் முக்கிய இலக்காக உள்ளது. குறிப்பாக தமிழ்நாடு, கேரளா, கர்நாடகா, ஆந்திரா, தெலங்கானா உள்ளிட்ட தென் மாநிலங்களில் பாஜகவுக்கு எதிரான வாக்குகள் எதிர்க்கட்சிகளுக்கு முக்கியமான பலமாக பார்க்கப்படுகின்றன.

இந்த நிலையில், விஜய் தனது பிரதமர் வேட்பாளர் என்ற அடையாளத்துடன் தமிழ்நாட்டைத் தாண்டி பிற தென் மாநிலங்களிலும் வேட்பாளர்களை களமிறக்கினால், பாஜகவுக்கு எதிரான வாக்குகள் காங்கிரஸ், தவெக உள்ளிட்ட பல்வேறு அணிகளுக்கு இடையே பிரியும் வாய்ப்பு உருவாகும்.

ஒரு தொகுதியில் எதிர்க்கட்சிகளின் வாக்குகள் பல அணிகளாகப் பிரிந்தால், ஒட்டுமொத்தமாக அதிக வாக்குகளைப் பெறாத கட்சிக்குக்கூட வெற்றி கிடைக்கலாம். அந்த வகையில், காங்கிரஸ் அல்லது அதன் கூட்டணிக்கு செல்லக்கூடிய மாற்று வாக்குகளில் ஒரு பகுதி விஜய் தலைமையிலான தவெகவுக்கு சென்றால், அது பாஜக மற்றும் அதன் கூட்டணிக் கட்சிகளுக்கு சாதகமான தேர்தல் கணக்கை உருவாக்கக்கூடும் என அரசியல் விமர்சகர்கள் கூறுகின்றனர்.

குறிப்பாக தென் மாநிலங்களில் பாஜகவுக்கு எதிரான வாக்குகள் பிளவுபட்டால், வடமாநிலங்களில் ஏற்கனவே உள்ள அதன் அரசியல் பலத்துடன் சேர்ந்து நாடாளுமன்றத் தேர்தலில் கூடுதல் நன்மையை பாஜக பெறக்கூடும் என்ற அச்சம் காங்கிரஸ் தரப்பில் ஏற்பட்டுள்ளதாக கூறப்படுகிறது.

இதுவே காங்கிரஸ் தலைவர்களின் முக்கிய கவலையாக மாறியுள்ளது. தமிழகத்தில் தவெகவுடன் கூட்டணியில் இருந்துகொண்டே, தேசிய அளவில் விஜய் தனிப்பாதையைத் தேர்ந்தெடுத்தால், பாஜகவுக்கு எதிரான எதிர்க்கட்சிகளின் ஒற்றுமை பலவீனமடையும் என்பது காங்கிரஸின் வாதமாக உள்ளது.

ஆனால் தவெக தரப்பில் வேறுவிதமான அரசியல் கணக்கு முன்வைக்கப்படுகிறது. தாங்கள் யாருடைய மாற்றாகவும் உருவாகவில்லை என்றும், தேசிய அளவில் வலுவான மாற்று அரசியல் சக்திக்கான இடத்தை நிரப்பவே முயற்சிப்பதாகவும் கட்சி தரப்பில் கூறப்படுகிறது.

இதனால் 2029 நாடாளுமன்றத் தேர்தலில் விஜய்யின் தேசிய அரசியல் பயணம் மிகப்பெரிய தாக்கத்தை ஏற்படுத்துமா என்ற எதிர்பார்ப்பு உருவாகியுள்ளது. குறிப்பாக, பாஜகவுக்கு எதிரான வாக்குகளை தவெக பிரித்தால், அது நரேந்திர மோடி தலைமையிலான பாஜகவுக்கு எதிர்பாராத தேர்தல் சாதகத்தை உருவாக்குமா என்பதே தற்போது தேசிய அரசியல் களத்தில் எழுந்துள்ள முக்கிய கேள்வியாக உள்ளது.