புதுக்கோட்டையில் இயற்கை வளங்கள் துறை அமைச்சர் ரகுபதி, நிருபர்களை சந்தித்து பேட்டி அளித்தார். அந்த பேட்டியில் அவர் கூறியது,“சீமான் எதற்காக இருந்தாலும் பொங்கலை வைப்பார்.

தமிழ்நாட்டின் அடையாளம் திராவிட கலாச்சாரத்தில் உள்ளது; அதனால் திராவிடச் சமூகத்தின் பாரம்பரியமாகவே நாம் பொங்கல் கொண்டாடி வருகிறோம். அண்ணாமலை வரும் போது தமிழர்களை குறிவைத்து தாக்குதல் என்று கூறுவது முறையற்றது. மராட்டியாவில் நடந்த சம்பவத்தைப் பேசியதும் மக்கள் அங்கேயும், இங்கேயும் புரிந்து கொள்ளவில்லை.எங்களுக்கு யாராலும் நெருக்கடி இல்லை.

தமிழகத்தில் பா.ஜனதா வலுவான கூட்டணியை அமைக்க முடியாது, பலப்படுத்தவும் முடியாது. எடப்பாடி பழனிசாமி புதிய கட்சி கூட்டணியில் இணைவார் என கூறி, பல புதிய கட்சிகள் உருவாகும் நிலையில் உள்ளன. ஆனால் அவை உண்மையில் வருமா என்பது தெரியவில்லை.

ஜனநாயகனுக்கு பெரும்பாலோர் குரல் கொடுத்து இருக்கிற நிலையில், விஜய் குரல் கொடுக்காததை வைத்து அவருடைய தைரியத்தை நமக்கு புரிந்துகொள்ள முடியும். 1965-ஆம் ஆண்டு நிகழ்வுகளை அடிப்படையாக வைத்து தயாரிக்கப்பட்ட படம் ‘பராசக்தி’. அப்போது, இந்தி திணிப்புக்கு எதிராக தமிழ்நாடு மாணவர் போராட்டம் நிகழ்த்தியது.

அப்போதைய காங்கிரஸ் கட்சி வேறு, தற்போதைய காங்கிரஸ் வேறு; அவர்கள் தங்கள் விமர்சன கருத்துக்களைத் தெரிவித்து வருகிறார்கள். இதனால் கூட்டணியில் பாதிப்பு ஏற்படாது.காங்கிரஸ் ஆட்சிக் காலத்தில் மத்திய அரசில் வந்த வருமானத்தை ஒப்பிடுகையில், பா.ஜனதா ஆட்சிக் காலத்தில் வருமானம் அதிகமாக வந்துள்ளது.

ஆனால், தமிழ்நாட்டிற்கு வந்த பங்களிப்பு மிகவும் குறைந்தது. ஐக்கிய முற்போக்கு கூட்டணி ஆட்சியின்போது மாநிலத்திற்கு சாலை மற்றும் பல முன்னேற்றத் திட்டங்கள் கிடைத்தன. அமித்ஷா, மோடி வருகை அளித்தாலும் நிலைமையில் மாற்றம் வராது; அதனால் அவர்கள் எதிர்பார்ப்பில் ஏமாற்றமடைய நேரிடும்” என அமைச்சர் ரகுபதி தெரிவித்துள்ளார்.