தமிழக அரசியல் அரங்கில் கடும் எதிர்பார்ப்பை ஏற்படுத்திய தவெக அரசின் நம்பிக்கை வாக்கெடுப்பு இன்று சட்டசபையில் பரபரப்பான சூழ்நிலையில் நடைபெற்றது. முதல்-அமைச்சர் விஜய் தலைமையிலான தமிழக வெற்றிக் கழகம் அரசின் பெரும்பான்மை பலம் குறித்து கடந்த சில நாட்களாக அரசியல் வட்டாரங்களில் பல்வேறு கருத்துகள் பரவி வந்த நிலையில், இன்று நடைபெற்ற வாக்கெடுப்பு அந்த விவாதங்களுக்கு அரசியல் ரீதியான தீர்ப்பாக மாறியது.

முதல்-அமைச்சர் விஜய் கொண்டு வந்த நம்பிக்கை தீர்மானம் மீது நீண்ட நேர விவாதம் நடைபெற்றது. ஆளுங்கட்சியும் எதிர்க்கட்சியும் மாறிமாறி தங்களது கருத்துகளை பதிவு செய்ததால் அவை முழுவதும் அரசியல் அனல் பறந்தது. விவாதம் நிறைவடைந்த பின்னர், உறுப்பினர்களை தனித்தனியாக கணக்கிட்டு உறுதிப்படுத்தும் நடைமுறைப்படி வாக்கெடுப்பு நடத்தப்படும் என சபாநாயகர் அறிவித்தார்.

அவையில் இல்லாத உறுப்பினர்கள் உடனடியாக உள்ளே வருவதற்காக மூன்று முறை எச்சரிக்கை மணி ஒலிக்கப்பட்டது. பின்னர் பேரவையின் அனைத்து நுழைவு வாயில்களையும் மூடும்படி அவைக்காவலர்களுக்கு சபாநாயகர் உத்தரவிட்டார். கதவுகள் அடைக்கப்பட்ட பிறகு, மிகுந்த பரபரப்பும் பதற்றமும் நிலவிய சூழலில் வாக்கெடுப்பு நடைமுறை முன்னெடுக்கப்பட்டது.

இதில், நம்பிக்கை தீர்மானத்திற்கு ஆதரவாக 144 சட்டமன்ற உறுப்பினர்கள் வாக்களித்தனர். எதிராக 22 உறுப்பினர்கள் வாக்களித்த நிலையில், மேலும் 5 உறுப்பினர்கள் நடுநிலை வகித்தனர். இதையடுத்து தீர்மானம் வெற்றிகரமாக நிறைவேறியதாக சபாநாயகர் அதிகாரப்பூர்வமாக அறிவித்தார்.வாக்கெடுப்பு நடைபெறும் தருணத்தில் திராவிட முன்னேற்ற கழகம் உறுப்பினர்கள் அவையிலிருந்து வெளிநடப்பு செய்தது கூடுதல் அரசியல் கவனத்தை ஈர்த்தது.

இதன்மூலம் 144 உறுப்பினர்களின் ஆதரவுடன் விஜய் தலைமையிலான தமிழக வெற்றிக் கழக அரசு தனது பெரும்பான்மை பலத்தை உறுதிப்படுத்தி ஆட்சியை தக்க வைத்துள்ளது.இந்த அரசியல் பரபரப்புக்கிடையே, மாணிக்கம் தாகூர் தனது எக்ஸ் தள பதிவின் மூலம் முதல்-அமைச்சர் விஜய்க்கு வாழ்த்து தெரிவித்துள்ளார்.

அவர் தனது பதிவில், “மக்கள் வழங்கிய ஜனநாயக ஆணை இன்று சட்டப்பேரவையில் மீண்டும் உறுதிப்படுத்தப்பட்டுள்ளது. 144 ஆதரவு வாக்குகளுடன் முதல்-அமைச்சர் விஜய் நம்பிக்கை வாக்கெடுப்பில் வெற்றி பெற்றுள்ளார்.

எதிராக பதிவானது 22 வாக்குகள் மட்டுமே. இது வெறும் அரசியல் வெற்றியல்ல; மாற்றத்திற்கும், நல்லாட்சிக்கும், மக்கள் நம்பிக்கைக்கும் கிடைத்த மகத்தான அங்கீகாரம்” என்று குறிப்பிட்டுள்ளார்.மேலும், “தமிழ்நாடு வெற்றி பெற்றுள்ளது. ஜனநாயகம் தனது வலிமையை மீண்டும் நிரூபித்துள்ளது. நாளைய அரசியல் பயணத்திலும் வெற்றி நமதே” என்றும் அவர் தனது பதிவில் தெரிவித்துள்ளது