இந்தியாவில் உள்நாட்டில் தயாரிக்கப்பட்ட பிரம்மோஸ் சூப்பர்சோனிக் க்ரூஸ் ஏவுகணை மற்றும் ஆகாஷ்தீர் வான் பாதுகாப்பு அமைப்புகளை வாங்குவதற்காக, ஐக்கிய அரபு அமீரகம் (யுஏஇ) இந்திய அரசுடன் பேச்சுவார்த்தை நடத்தி வருவதாக தகவல்கள் வெளியாகியுள்ளன. இது இந்தியாவின் பாதுகாப்பு ஏற்றுமதி துறைக்கு முக்கிய முன்னேற்றமாக பார்க்கப்படுகிறது.

ஈரானுடனான சமீபத்திய பதற்றமான சூழ்நிலைக்குப் பிறகு, தனது பாதுகாப்பு திறனை விரைவாக மேம்படுத்த யுஏஇ தீவிர முயற்சியில் ஈடுபட்டுள்ளது. குறிப்பாக, உலகின் முக்கியமான கச்சா எண்ணெய் போக்குவரத்து பாதைகளில் ஒன்றான ஹோர்முஸ் நீரிணையின் பாதுகாப்பை உறுதிப்படுத்துவதில் அந்நாடு கவனம் செலுத்தி வருகிறது.இதன் ஒரு பகுதியாக, இந்தியாவின் மேம்பட்ட பாதுகாப்பு தொழில்நுட்பங்கள் மற்றும் ஆயுத அமைப்புகள் மீது யுஏஇ ஆர்வம் காட்டியுள்ளது.

இந்தியாவும் ரஷ்யாவும் இணைந்து உருவாக்கிய பிரம்மோஸ் சூப்பர்சோனிக் க்ரூஸ் ஏவுகணை, உலகின் மிக வேகமான க்ரூஸ் ஏவுகணைகளில் ஒன்றாக கருதப்படுகிறது. நிலம், கடல் மற்றும் வான்வழி தளங்களிலிருந்து ஏவக்கூடிய திறன் கொண்ட இந்த ஏவுகணை, பல நாடுகளின் கவனத்தையும் ஈர்த்துள்ளது.

ஆகாஷ்தீர் (Akashteer) என்பது பாரத் எலக்ட்ரானிக்ஸ் நிறுவனம் (BEL) மற்றும் இந்திய ராணுவம் இணைந்து உருவாக்கிய முழு தானியங்கி வான் பாதுகாப்பு கட்டளை மற்றும் கட்டுப்பாட்டு அமைப்பாகும். வான் பாதுகாப்பு நடவடிக்கைகளை ஒருங்கிணைத்து, எதிரி தாக்குதல்களை துல்லியமாக கண்காணித்து எதிர்கொள்ளும் திறன் கொண்டதாக இது கருதப்படுகிறது.

'மேக் இன் இந்தியா' திட்டத்தின் கீழ் உள்நாட்டில் தயாரிக்கப்படும் பாதுகாப்பு உபகரணங்களை உலக சந்தைக்கு கொண்டு செல்லும் முயற்சியில் இந்தியா தீவிரமாக செயல்பட்டு வருகிறது. அந்த வகையில், யுஏஇ-யின் ஆர்வம் இந்திய பாதுகாப்பு ஏற்றுமதிக்கு புதிய வாய்ப்புகளை உருவாக்கும் என நிபுணர்கள் கருதுகின்றனர்.

இந்தியா-யுஏஇ இடையேயான பேச்சுவார்த்தை தற்போது ஆரம்ப கட்டத்தில் இருந்தாலும், அது வேகமாக முன்னேறி வருவதாக தகவல்கள் தெரிவிக்கின்றன. ஆயுத கொள்முதலை பல்வேறு நாடுகளுக்கு விரிவுபடுத்தும் கொள்கையை பின்பற்றி வரும் யுஏஇ, இதற்கு முன்பு தென் கொரியாவுடன் 35 பில்லியன் டாலர் மதிப்பிலான பாதுகாப்பு ஒத்துழைப்பு ஒப்பந்தம் மேற்கொண்டிருந்தது குறிப்பிடத்தக்கது.

இந்தியாவின் பாதுகாப்பு ஏற்றுமதி வளர்ச்சியில் இந்த பேச்சுவார்த்தை முக்கிய மைல்கல்லாக அமையுமா என்பது அடுத்த சில மாதங்களில் தெளிவாகும் என பாதுகாப்புத் துறை வட்டாரங்கள் எதிர்பார்க்கின்றன.